ലണ്ടന്‍: ലോകകപ്പ് ഫൈനലില്‍ ഇംഗ്ലണ്ടിനോട് പരാജയപ്പെട്ടെങ്കിലും അഭിമാനത്തോടെയാണ് മടങ്ങുന്നതെന്ന് ന്യൂസിലന്‍ഡ് നായകന്‍ കെയിന്‍ വില്യംസണ്‍. പരാജയപ്പെട്ടതില്‍ സങ്കടമില്ല. എന്നാല്‍ രണ്ട് തവണ ശ്രമിച്ചിട്ടും കിട്ടാത്ത കിരീടം അടുത്ത തവണ ന്യൂസിലന്‍ഡിലെത്തിക്കുമെന്നും കെയ്ന്‍ വില്യംസണ്‍ പറഞ്ഞു. മത്സരത്തില്‍ ഞങ്ങള്‍ തോറ്റിട്ടില്ല. ഞങ്ങള്‍ തോല്‍ക്കാന്‍ തയാറായിട്ടുമില്ല.
അവസാന ശ്വാസം വരെ പോരാടിയിട്ടുണ്ട്. എന്നാല്‍ ഐ.സി.സിയുടെ നിയമമാണ് കാര്യങ്ങള്‍ തീരുമാനിച്ചത്. ഇതില്‍ പരിഭവമില്ലെന്നും വില്യംസണ്‍ കൂട്ടിച്ചേര്‍ത്തു. 2015 ല്‍ നടന്ന ലോകകപ്പ് ഫൈനലിലും ന്യൂസിലന്‍ഡിന് കപ്പ് നഷ്ടമായിരുന്നു. അന്ന് ബ്രണ്ടന്‍ മക്കല്ലമായിരുന്നു ടീമിനെ നയിച്ചിരുന്നത്. 2019 ലും ഇത് ആവര്‍ത്തിക്കുകയായിരുന്നു. ഇത്തവണ കെയിന്‍ വില്യംസണ്‍ നയിച്ച ടീമാണ് ഫൈനലില്‍ പരാജയപ്പെട്ടത്. ഫൈനലില്‍ നിര്‍ണായക നിമിഷങ്ങളില്‍ പരാജയപ്പെട്ടപ്പോഴെല്ലാം ക്ഷുഭിതനാകാത്ത വില്യംസണ്‍ എല്ലാം ചിരിയിലൊതുക്കുകയായിരുന്നു. മത്സരത്തിന്റെ ഏത് ഘട്ടത്തിലും കാര്യങ്ങള്‍ പക്വമായി നിയന്ത്രിച്ച കെയിന്‍ വില്യംസണേയാണ് ഐ.സി.സി ഏറ്റവും നല്ല ക്യാപ്റ്റനായി തിരഞ്ഞെടുത്തിട്ടുള്ളത്.
ആദ്യ മത്സരങ്ങളില്‍ മികച്ച പ്രകടനം നടത്തിയ ന്യൂസിലന്‍ഡിന് അവസാനം തിരിച്ചടി നേരിട്ടു. പിന്നീട് നടത്തിയ മികച്ച പ്രകടനമാണ് കിവികള്‍ക്ക് ഫൈനലിലേക്കുള്ള വഴി തുറന്നത്. ടീമിലെ മറ്റുതാരങ്ങളും ഓരോ ഘട്ടത്തിലും സംയമനത്തോടെയായിരുന്നു പെരുമാറിയത്. ആരും അമിതമായി ആഹ്ലാദിച്ചില്ല. തോല്‍വിയില്‍ വലിയ സങ്കടവും രേഖപ്പെടുത്തിയില്ല. അതേസമയം, സൂപ്പര്‍ ഓവറില്‍ ബാറ്റ് ചെയ്യാനെത്തിയ നീഷം വികാരഭരിതനായിട്ടായിരുന്നു പ്രതികരിച്ചത്. എത്ര കാലം കഴിഞ്ഞാലും ലോകകപ്പ് ഫൈനലിലെ അവസാന അര മണിക്കൂര്‍ മറക്കാന്‍ കഴിയില്ല. ഇംഗ്ലണ്ട് ജയം അര്‍ഹിച്ചിരുന്നു. അതവര്‍ നേടുകയും ചെയ്തു. അവസാന സമയത്തെ ഓവര്‍ ത്രോയും സിക്‌സുമാണ് കാര്യങ്ങള്‍ മാറ്റിയത്. പുതിയ തലമുറ ഇനി ക്രിക്കറ്റിലേക്ക് വരരുതെന്നും വല്ല ബോക്‌സിങ് റിങ്ങിലേക്കോ മറ്റോ പോയാല്‍ മതിയെന്നും നീഷം സോഷ്യല്‍ മീഡിയയില്‍ കുറിച്ചു. ഇത്തരം ഗെയിമുകളിലേക്ക് വന്നാല്‍ മനഃസമാധാനത്തോടെ മരിക്കാന്‍ കഴിയില്ലെന്നും നീഷം കുറിച്ചു.