തൊട്ടില്‍പ്പാലം: എസ്.കെ.എസ്.എസ്.എഫ് കുറ്റ്യാടി മേഖല കമ്മിറ്റി റമദാനില്‍ ആശുപത്രികള്‍ കേന്ദ്രീകരിച്ച് നടത്തുന്ന ഭക്ഷണ വിതരണ പരിപാടിയുടെ ഒരുക്കങ്ങള്‍ പൂര്‍ത്തിയായെന്ന് സംഘാടകര്‍ അറിയിച്ചു. കുറ്റ്യാടിയിലെ സര്‍ക്കാര്‍-സ്വകാര്യ ആശുപത്രികളില്‍ കഴിയുന്ന രോഗികള്‍ക്കും കൂട്ടിരിപ്പുകാര്‍ക്കുമാണ് റമാദാന്‍ മുപ്പത് ദിനവും മേഖല കമ്മിറ്റിയുടെ ആഭിമുഖ്യത്തില്‍ നോമ്പുതുറ-അത്താഴ വിഭവങ്ങള്‍ എത്തിച്ചു നല്‍കുന്നത്. അഞ്ചാം വര്‍ഷത്തിലേക്ക് കടക്കുന്ന വിതരണ പരിപാടി ഈ പ്രാവശ്യം സമീപ പ്രദേശമായ തൊട്ടില്‍പ്പാലത്തെ ഒരു സ്വകാര്യ ആശുപത്രിയിലേക്കും വ്യാപിപ്പിച്ചിട്ടുണ്ട്.
നോമ്പ് ഒന്നു മുതല്‍ ആരംഭിക്കുന്ന ഭക്ഷണദാനം സമാപനമെന്നോണം പെരുന്നാള്‍ ദിനത്തിലും ജാതി-മത ഭേദമന്യേ വിപുലമായി നല്‍കുന്നുണ്ട്. ദിവസവും പതിനഞ്ചായിരം രൂപ കണക്കാക്കി നാലര ലക്ഷത്തോളം രൂപ ചെലവിലാണ് റമദാന്‍ മുപ്പത് വരെയുള്ള കാലയളവില്‍ ഭക്ഷണം വിതരണം ചെയ്യുന്നത്. ഓരോ ദിവസവും രാവിലെ ചീഫ് കോഓര്‍ഡിനേറ്റര്‍മാര്‍ ആശുപത്രികളിലെത്തി ആവശ്യക്കാര്‍ക്ക് ടോക്കണ്‍ നല്‍കുന്നതനുസരിച്ചാണ് ഭക്ഷണം തയാറാക്കുന്നതും നല്‍കുന്നതും.
ഇതിനായി മേഖലയിലെ മുപ്പത് ശാഖകളില്‍ നിന്നായി മുന്നൂറോളം സേവന സന്നദ്ധരായ വിഖായ വളണ്ടിയര്‍മാര്‍ രംഗത്തുണ്ട്.
വാര്‍ത്താ സമ്മേളനത്തില്‍ ടി.പി മജീദ് കൊടക്കല്‍, യു.കെ അബ്ദുല്‍ ഹമീദ് ഹാജി, ഡോ. സമീര്‍ അഹമ്മദ്, ടി.പി റഫീഖ് കൊടക്കല്‍ പങ്കെടുത്തു.