കോഴിക്കോട്: ജില്ലയില്‍ ഇടതുമുന്നണിക്ക് മുന്നേറ്റം. കോര്‍പറേഷനിലെ 75 വാര്‍ഡുകളില്‍ 51 സീറ്റ് നേടി എല്‍.ഡി.എഫ് ഭരണം നിലനിര്‍ത്തി. യു.ഡി.എഫിന് 17 സീറ്റേ ലഭിച്ചുള്ളൂ. ബി.ജെ.പി ഏഴു സീറ്റില്‍ ജയിച്ചു. ജില്ലാ പഞ്ചായത്തില്‍ 27 ഡിവിഷനില്‍ എല്‍.ഡി.എഫ് 18 സീറ്റ് നേടി ഭരണത്തുടര്‍ച്ച ഉറപ്പാക്കി. യു.ഡി.എഫിന് ഒന്‍പത് സീറ്റാണ് ലഭിച്ചത്. 70 ഗ്രാമപഞ്ചായത്തുകളില്‍ 43 ഇടത്ത് എല്‍.ഡി.എഫും 27 ഇടത്ത് യു.ഡി.എഫും ഭരണം നേടി. മുനിസിപ്പാലിറ്റികളില്‍ നാലിടത്ത് യു.ഡി.എഫും രണ്ടിടത്ത് എല്‍.ഡി.എഫും ഭരണത്തിലേറി.
എല്‍.ജെ.ഡിയുടെ മുന്നണി മാറ്റത്തോടെ കഴിഞ്ഞ തവണ പാതിവഴിയില്‍ കൈവിട്ട പയ്യോളി യു.ഡി.എഫ് തിരിച്ചുപിടിച്ചു. കഴിഞ്ഞ തവണ അവിശ്വാസത്തിലൂടെ ഭരണം നഷ്ടമായ ഫറോക്കില്‍ യു.ഡി.എഫ് തിരിച്ചെത്തി. മുക്കത്ത് രണ്ട് മുന്നണികളും തുല്യസീറ്റുകള്‍ നേടി. ഒരു സീറ്റില്‍ കോണ്‍ഗ്രസ് വിമതനും രണ്ട് സീറ്റില്‍ എന്‍.ഡി.എയും നേടി. ഭരണം ആര്‍ക്കെന്നത് വിമതന്‍ തീരുമാനിക്കും.
12 ബ്ലോക്ക് പഞ്ചായത്തുകളില്‍ ഒന്‍പതിടത്ത് എല്‍.ഡി.എഫും മൂന്നിടത്ത് യു.ഡി.എഫും ഭരണത്തിലെത്തി. ഒഞ്ചിയം മേഖലയില്‍ ആര്‍.എം.പിയുമായി ചേര്‍ന്നുള്ള യു.ഡി.എഫിന്റെ ജനകീയ മുന്നണി മൂന്ന് പഞ്ചായത്തുകളില്‍ ഭരണം നേടി. ചോറോട് പഞ്ചായത്തില്‍ ജനകീയ മുന്നണിയെ പരാജയപ്പെടുത്തി എല്‍.ഡി.എഫ് ഭരണം നേടി. വടകര ബ്ലോക്കില്‍ ആര്‍.എം.പി രണ്ട് സീറ്റ് നേടി. വടകര ബ്ലോക്ക് പഞ്ചായത്തിലെ കല്ലാമല ഡിവിഷനില്‍ ജനകീയ മുന്നണി സ്ഥാനാര്‍ഥി പരാജയപ്പെട്ടു. കൊടുവള്ളി മുന്‍സിപ്പാലിറ്റിയിലെ പതിനഞ്ചാം ഡിവിഷനില്‍ സ്വതന്ത്രനായി മത്സരിച്ച കാരാട്ട് ഫൈസല്‍ വിജയിച്ചു.