മക്ക: ഇന്ത്യയില്‍നിന്ന് ഹജ്ജിന് പ്രവഹിച്ചു കൊണ്ടിരിക്കുന്ന തീര്‍ഥാടകരുടെ എണ്ണം ഒരു ലക്ഷം കവിഞ്ഞു. ബുധനാഴ്ച അവസാനത്തോടെ കേന്ദ്ര ഹജ്ജ് കമ്മിറ്റി മുഖേനയും സ്വകാര്യ ഗ്രൂപ്പുകളിലുമായി 1,02,836 ഹാജിമാരാണ് ഇന്ത്യയില്‍ നിന്നെത്തിയതെന്ന് ജിദ്ദയിലെ ഇന്ത്യന്‍ ഹജ്ജ് മിഷന്‍ അറിയിച്ചു. മൊത്തം ഇന്ത്യന്‍ ഹാജിമാരുടെ പകുതിയിലേറെ വരും ഇത്.
സ്വകാര്യ ഗ്രൂപ്പ് വഴിയുള്ള 60,000 ഹാജിമാരുള്‍പ്പെടെ രണ്ടു ലക്ഷം പേരാണ് ഈ വര്‍ഷത്തെ വിശുദ്ധ ഹജ്ജില്‍ പങ്കെടുക്കുന്നത്.81,745 പേരാണ് ഹജ്ജ് കമ്മിറ്റി മുഖേന എത്തിയത്. ഇവര്‍ക്കായി മൊത്തം 309 ഹജ്ജ് വിമാനസര്‍വിസ് നടത്തി.
ഇതില്‍ കരിപ്പൂര്‍, നെടുമ്പാശ്ശേരി എന്നിവിടങ്ങളില്‍നിന്ന് മദീനയില്‍ എത്തിയ 46 വിമാനങ്ങളും ഉള്‍പ്പെടുന്നു.
ഇന്ത്യന്‍ ഹാജിമാരില്‍ ഇതുവരെയായി അഞ്ചു പേര്‍ മരണപ്പെട്ടിട്ടുണ്ട്. മൂന്നു പേര്‍ ഹജ്ജ് കമ്മിറ്റിമുഖേന വന്നവരാണ്. രണ്ടു പ്രസവങ്ങളും നടന്നു.
ഹജ്ജ് ഒരുക്കങ്ങള്‍ പുരോഗമിക്കുകയാണ്. മക്കാ ഹറമിലെ ഒന്നാം നമ്പര്‍ കവാടമായ ബാബ് മലിക് അബ്ദുല്‍ അസീസ് തീര്‍ഥാടകര്‍ക്കായി തുറന്നു.
തീര്‍ഥാടകരുടെ തിരക്കു പരിഗണിച്ച് ഇനിയും പൂര്‍ത്തിയാകേണ്ട നിര്‍മാണ ജോലികള്‍ താല്‍ക്കാലികമായി നിര്‍ത്തിവച്ചാണ് കവാടം തുറന്നത്.