കണ്ണൂര്‍: ബി.ജെ.പി പ്രവര്‍ത്തകനെ വീട്ടില്‍ കയറി വെട്ടിക്കൊലപ്പെടുത്തിയ കേസില്‍ ശിക്ഷിക്കപ്പെട്ട സി.പി.എം പ്രവര്‍ത്തകരായ പ്രതികള്‍ പൊലിസ് കസ്റ്റഡിയില്‍ മദ്യപിച്ച സംഭവത്തില്‍ ഡി.ജി.പി ലോക്‌നാഥ് ബെഹ്‌റ റിപ്പോര്‍ട്ട് തേടി.
ജില്ലാ സ്‌പെഷ്യല്‍ ബ്രാഞ്ചിനോടാണ് ഡി.ജി.പി റിപ്പോര്‍ട്ട് ആവശ്യപ്പെട്ടത്. ജില്ലാ പൊലിസ് മേധാവിയുടെ നിര്‍ദേശത്തെ തുടര്‍ന്ന് തലശ്ശേരി ഡിവൈ.എസ്.പി കെ.വി വേണുഗാപാല്‍ സംഭവത്തെ കുറിച്ച് അന്വേഷിക്കും. അന്വേഷണ റിപ്പോര്‍ട്ടിനു ശേഷം തുടര്‍നടപടികളുണ്ടാകും. മാധ്യമ വാര്‍ത്തകളുടെ അടിസ്ഥാനത്തിലാണ് എസ്.പി അന്വേഷണത്തിന് നിര്‍ദേശം നല്‍കിയത്.
ബി.ജെ.പി പ്രവര്‍ത്തകനെ വെട്ടിക്കൊന്ന കേസില്‍ ജീവപര്യന്തം തടവും പിഴയും ശിക്ഷ ലഭിച്ച പ്രതികളായ സി.പി.എം പ്രവര്‍ത്തകരാണ് പൊലിസ് കസ്റ്റഡിയിലിരിക്കെ മദ്യപിച്ചത്. രാവിലെ തലശ്ശേരി കോടതിയില്‍ ഹാജരാക്കിയപ്പോള്‍ പ്രതികള്‍ മദ്യപിച്ചിട്ടുണ്ടായിരുന്നില്ല. ഡിവൈ.എസ്.പിയുടെ വാഹനത്തിലാണ് പ്രതികളെ കോടതിയില്‍ ഹാജരാക്കിയിരുന്നത്. എസ്‌കോര്‍ട്ടുമുണ്ടായിരുന്നു.
രാവിലെ 11ന് ശിക്ഷ വിധിച്ച് കഴിഞ്ഞ് കോടതി നടപടികള്‍ പൂര്‍ത്തിയാക്കി സെന്‍ട്രല്‍ ജയിലില്‍ എത്തിച്ചപ്പോഴാണ് പ്രതികള്‍ മദ്യപിച്ചതായി സംശയമുയര്‍ന്നത്.
തുടര്‍ന്നാണ് പ്രതികളെ വൈദ്യപരിശോധനയ്ക്കായി ജില്ലാ ആശുപത്രിയിലെത്തിച്ചത്.
കോടിയേരി ഇല്ലത്ത്താഴയിലെ ബി.ജെ.പി പ്രവര്‍ത്തകന്‍ സൗപര്‍ണ്ണികയില്‍ കെ.വി സുരേന്ദ്രനെ (62) വെട്ടികൊലപ്പെടുത്തിയ കേസിലെ പ്രതികളാണ് പൊലിസ് കസ്റ്റഡിയില്‍ മദ്യപിച്ചത്. കേസിലെ ഒന്നാംപ്രതി തിരുവങ്ങാട് ഊരാംങ്കോട് സ്വദേശികളായ പുലപ്പാടി വീട്ടില്‍ എം. അഖിലേഷ് (35), മൂന്നാംപ്രതി മാണിക്കോത്ത് വീട്ടില്‍ എം. ലിജേഷ് (32), നാലാംപ്രതി മുണ്ടോത്ത് കണ്ടിയില്‍ എം. കലേഷ് (36), അഞ്ചാംപ്രതി വാഴയില്‍ കെ. വിനീഷ് (25), ആറാംപ്രതി പി.കെ ഷൈജേസ് (28) എന്നിവരാണ് ശിക്ഷ ലഭിച്ച് ജയിലിലേക്കുള്ള യാത്രയ്ക്കിടെ മദ്യപിച്ചത്.
ഇവരെ ജില്ലാ ആശുപത്രിയിലെ പരിശോധനയ്ക്ക് ശേഷം കണ്ണൂര്‍ സെന്‍ട്രല്‍ ജയിലിലാക്കി.