മക്ക: വിശുദ്ധ ഹജ്ജ് തീര്‍ഥാടനത്തിനെത്തിയ ഇന്ത്യന്‍ ഹാജിമാര്‍ മുഴുവന്‍ ഇന്നത്തോടെ മക്കയില്‍ കേന്ദ്രീകരിക്കപ്പെടും.
മദീനയില്‍ നേരത്തെ വന്നിറങ്ങിയ ഇന്ത്യന്‍ തീര്‍ഥാടക സംഘത്തിന്റെ മക്ക യാത്ര ഇന്നു പരിപൂര്‍ണമാകുന്നതോടെ ഇനി ഹജ്ജ് കഴിയുന്നതുവരെ തീര്‍ഥാടകരുടെ കേന്ദ്രം മക്ക മാത്രമായിരിക്കും.
ഇന്നത്തോടെ ഇന്ത്യന്‍ ഹജ്ജ് മിഷന്റെ കീഴില്‍ ഹജ്ജ് കര്‍മങ്ങള്‍ക്കായുള്ള പ്രാഥമിക ഒരുക്കങ്ങള്‍ പൂര്‍ത്തിയാകും.
പുണ്യസ്ഥലങ്ങളായ മിന, അറഫാ, മുസ്ദലിഫ എന്നിവിടങ്ങളില്‍ ഹാജിമാര്‍ക്കുള്ള സൗകര്യങ്ങള്‍ ഇതിനകം തന്നെ പൂര്‍ത്തിയായിട്ടുണ്ട്.
ഇന്ത്യന്‍ തീര്‍ഥാടകരുടെ മിന ടെന്റുകളിലെ സൗകര്യങ്ങളും സജ്ജീകരണങ്ങളും പൂര്‍ത്തിയാക്കാനുള്ള അവസാന തയാറെടുപ്പിലാണ് ഇന്ത്യന്‍ ഹജ്ജ് മിഷന്‍.
ഇന്നുരാത്രിയോടെ മദീനയില്‍ വന്നിറങ്ങിയ 63,000 തീര്‍ഥാടകരും മക്കയില്‍ എത്തിച്ചേരും. ഏതാനും തീര്‍ഥാടകര്‍ ചികിത്സയില്‍ കഴിയുന്നുണ്ടെങ്കിലും അവരെയും ഉടന്‍ തന്നെ മക്കയിലേക്ക് എത്തിക്കാനുള്ള ശ്രമത്തിലാണ് അധികൃതര്‍.
ജിദ്ദ വഴി രണ്ടാം ഘട്ടത്തില്‍ എത്തുന്ന തീര്‍ഥാടകരും ഇപ്പോള്‍ മക്കയിലാണുള്ളത്. തീര്‍ഥാടകര്‍ മുഴുവന്‍ മക്കയില്‍ കേന്ദ്രീകരിക്കുന്നതോടെ മദീനയിലെ ഇന്ത്യന്‍ ഹജ്ജ് മിഷന്‍ ഉദ്യോഗസ്ഥര്‍ക്ക് മക്കയിലേക്കുള്ള ചുമതലയും നല്‍കും.
സഊദി അധികൃതരുമായി ബന്ധപ്പെട്ട് ഇന്ത്യന്‍ ഹാജിമാര്‍ക്കുള്ള സൗകര്യങ്ങള്‍ ഇന്ത്യന്‍ ഹജ്ജ് മിഷന്‍ പരിശോധിക്കുന്നുണ്ട്. ഇതിന്റെ ഭാഗമായി മക്കയിലെ ഏഷ്യന്‍ രാജ്യങ്ങള്‍ക്കായുള്ള മുത്വവ്വിഫ് ഓഫിസിലെത്തി ഇന്ത്യന്‍ ഹജ്ജ് മിഷന്‍ ഉദ്യോഗസ്ഥര്‍ അധികൃതരുമായി കൂടിക്കാഴ്ച നടത്തി.
ഇന്ത്യന്‍ ഹജ്ജ് മിഷന്‍ ഉദ്യോഗസ്ഥ സംഘം പുണ്യസ്ഥലങ്ങളില്‍ ഇന്ത്യന്‍ ഹാജിമാര്‍ക്കായി മുത്വവ്വിഫ് ഏര്‍പ്പെടുത്തിയ സൗകര്യങ്ങള്‍ വിശകലനം ചെയ്തു. മുത്വവ്വിഫ് ഓഫിസില്‍ എത്തിയ ഇന്ത്യന്‍ ഹജ്ജ് കോണ്‍സുല്‍ മുഹമ്മദ് നൂര്‍ റഹ്മാന്‍ ശൈഖിന്റെ നേതൃത്വത്തിലുള്ള ഇന്ത്യ ഹജ്ജ് മിഷന്‍ സംഘത്തെ മുത്വവ്വിഫ് ഓഫിസ് അധികൃതര്‍ സ്വീകരിച്ചു.