പള്ളിപ്പുറം: ദേശീയപാതയില്‍ പള്ളിപ്പുറം സി.ആര്‍.പി.എഫ് ജങ്ഷന്‍ അപകട മുനമ്പായി മാറുന്നു. ഒരുമാസത്തിനിടയില്‍ അന്യസംസ്ഥാന ചരക്കുലോറികള്‍ അടക്കം നാല് വാഹനങ്ങളാണ് ഇവിടെ മറിഞ്ഞത്. ഇന്നലെ വീണ്ടും ഒരുലോറി ഇടതുവശത്തേക്ക് ചരിഞ്ഞ് മറിയുമെന്നവസ്ഥയിലായി.
പള്ളിപ്പുറം സി.ആര്‍.പി ജവാന്‍മാര്‍ ഓടിയെത്തി ട്രാക്ടറിന്റെ സഹായത്തോടെ രക്ഷാപ്രവര്‍ത്തനം നടത്തിയത് കൊണ്ട് വന്‍ ദുരന്തം ഒഴിവായി. ആറുമാസം മുന്‍പ് ദേശീയപാത റീടാറിങ് നടത്തിയപ്പോള്‍ ഉണ്ടായ അപകാതയാണ് വാഹനങ്ങള്‍ മറിയാന്‍ കാരണമെന്ന് ചൂണ്ടികാണിക്കപ്പെടുന്നു.
റോഡിന്റെ ഒരുവശത്തെ ചരിവും ഇരുവശവും മണ്ണിട്ട് നികത്താത്തതിനാല്‍ തറനിരപ്പില്‍ നിന്നുള്ള പൊക്കവുമാണ് വാഹനങ്ങള്‍ ഒരുവശത്തേക്ക് മറിയാനിടയാകുന്നത്. പലപ്രാവശ്യം മംഗലപുരം പൊലിസ് അടക്കം ബന്ധപ്പെട്ടവരെ അറിയിച്ചെങ്കിലും പരിഹാരമുണ്ടായിട്ടില്ല. അപകടം പതിയിരിക്കുന്ന ഇവിടെയാണ് ബസ് സ്റ്റോപ്പ്. മിക്കസമയത്തും ജവാന്‍മാരുടെ കുടുംബങ്ങളും സമീപത്തെ കേന്ദ്രീയ വിദ്യാലയത്തിലെ വിദ്യാര്‍ഥികളടക്കം നൂറുകണക്കിന് പേരാണ് ബസ് കാത്ത് നില്‍ക്കുന്നത്.
ഇതിന് തൊട്ടടുത്തുണ്ടായ അപകടത്തിലാണ് ബാലഭാസ്‌ക്കറും മകളും മരിച്ചത്. ഒരുവര്‍ഷത്തിനിടയില്‍ ഈ പാതയില്‍ 90 അപടങ്ങള്‍ ഉണ്ടാകുകയും 17 പേര്‍ മരിക്കുകയും ചെയ്തിട്ട് അപകട മേഖലയെന്ന് കാണിക്കാന്‍ പോലു ഒരു സൂചനബോര്‍ഡുപോലുമില്ല.