മലപ്പുറം: തൃശൂരില്‍ നടന്ന സംസ്ഥാന സുബ്രതോകപ്പ് ഫുട്‌ബോളില്‍ ആണ്‍കുട്ടികളുടെ അണ്ടര്‍ 17 വിഭാഗത്തില്‍ ചേലേമ്പ്ര എന്‍.എന്‍.എം.എച്ച്.എസ്.എസ് ചാംപ്യന്‍മാരായി.
അണ്ടര്‍ 17 പെണ്‍കുട്ടികളുടെ വിഭാഗത്തില്‍ നടക്കാവ് ഗേള്‍സ് ഹയര്‍ സെക്കന്‍ഡറി സ്‌കൂളും കിരീടം സ്വന്തമാക്കി. ഇന്നലെ നടന്ന ഫൈനലില്‍ തിരുവനന്തപുരം സെന്റ് ജോസഫ് ഹയര്‍ സെക്കന്‍ഡറി സ്‌കൂളിനെ എതിരില്ലാത്ത അഞ്ച് ഗോളിന് പരാജയപ്പെടുത്തിയാണ് ചേലേമ്പ്ര വീണ്ടും സുബ്രതോകപ്പ് ചാംപ്യന്‍മാരായത്. ടീമിന് വേണ്ടി ടി.കെ ബിന്‍ജാസ് ഹാട്രിക് നേടി. വി.വി ഫയാസ്, അനസ് കോഴിക്കോടന്‍ എന്നിവര്‍ ഓരോ ഗോള്‍ വീതം നേടി. ഐ.എം വിജയന്‍ ജേതാക്കള്‍ക്ക് ട്രോഫികള്‍ സമ്മാനിച്ചു.
ഇത് തുടര്‍ച്ചയായി രണ്ടാം തവണയാണ് ചേലേമ്പ്ര സ്‌കൂള്‍ അണ്ടര്‍ 17 ടീം സംസ്ഥാന ചാംപ്യന്‍മാരാകുന്നത്. കഴിഞ്ഞ വര്‍ഷം ഡല്‍ഹിയില്‍ നടന്ന അന്താരാഷ്ട്ര സുബ്രതോകപ്പ് ഫുട്ബാള്‍ ടൂര്‍ണമെന്റില്‍ കേരളത്തെ പ്രതിനിധീകരിച്ച് കളിക്കുകയും സെമി ഫൈനലില്‍ അഫ്ഗാനിസ്ഥാനോട് പൊരുതിത്തോല്‍ക്കുകയുമായിരുന്നു.
മന്‍സൂര്‍ അലി പരിശീലിപ്പിക്കുന്ന ചേലേമ്പ്ര സ്‌കൂള്‍ ഇതോടെ അടുത്ത മാസം ഡല്‍ഹിയില്‍ നടക്കുന്ന രാജ്യാന്തര ടൂര്‍ണമെന്റിന് യോഗ്യത നേടി.
കഴിഞ്ഞ ദിവസം നടന്ന പെണ്‍കുട്ടികളുടെ വിഭാഗത്തില്‍ തിരുവനന്തപുരം വെള്ളയാണി അയ്യങ്കാളി സ്‌കൂളിനെ 2-1 എന്ന സ്‌കോറിന് പരാജയപ്പെടുത്തി കോഴിക്കോട് നടക്കാവ് ഗേള്‍സ് ഹയര്‍ സെക്കന്‍ഡറി സ്‌കൂള്‍ രാജ്യാന്തര മത്സരത്തിന് യോഗ്യത നേടി.
ആണ്‍കുട്ടികളുടെ അണ്ടര്‍ 14 വിഭാഗത്തില്‍ തൃശൂര്‍ ദീപ്തി ഹൈസ്‌കൂളിനെ എതിരില്ലാത്ത അഞ്ച് ഗോളിന് പരാജയപ്പെടുത്തി എടത്തനാട്ടുകര ഓറിയന്റല്‍ ഹൈസ്‌കൂള്‍ ടീമും കിരീടം സ്വന്തമാക്കി.