ബംഗളൂരു: കര്‍ണാടകയില്‍ കോണ്‍ഗ്രസും ജെ.ഡി.എസും തമ്മില്‍ അസ്വാരസ്യം പുകയുന്നുണ്ടെങ്കിലും സര്‍ക്കാരിന്റെ പ്രവര്‍ത്തനം സാധാരണ നിലയില്‍ മുന്നോട്ടുനീങ്ങുന്നതിനിടയില്‍ ഭരണകക്ഷിയെ ഞെട്ടിച്ച് ഏക ബി.എസ്.പി മന്ത്രി രാജിവച്ചു.
കര്‍ണാടക സംസ്ഥാന നിയമസഭയിലേക്ക് തെരഞ്ഞെടുക്കപ്പെട്ട ഏക ബി.എസ്.പി അംഗമായ എന്‍. മഹേഷ് ആണ് മന്ത്രിസഭയില്‍ നിന്ന് രാജിവച്ചത്. രാജിക്കുപിന്നിലെ കാരണം വ്യക്തിപരമെന്ന് പറഞ്ഞ അദ്ദേഹം സര്‍ക്കാരിനുള്ള പിന്തുണ തുടര്‍ന്നും നല്‍കുമെന്ന് അറിയിച്ചു. മുഖ്യമന്ത്രി എച്ച്.ഡി ദേവഗൗഡക്ക് രാജിക്കത്ത് നല്‍കിയ അദ്ദേഹം ലോക്‌സഭാ തെരഞ്ഞെടുപ്പില്‍ പാര്‍ട്ടിയെ ശക്തിപ്പെടുത്തുന്നതിനുള്ള പ്രവര്‍ത്തനത്തില്‍ സജീവമാകുന്നതിനുവേണ്ടിയാണ് ഈ നടപടിയെന്ന് അറിയിച്ചു. സംസ്ഥാന സര്‍ക്കാരില്‍ വിദ്യാഭ്യാസ മന്ത്രിയായിരുന്നു മഹേഷ്. തന്റെ മണ്ഡലമായ കൊല്ലഗലില്‍ ശ്രദ്ധ കേന്ദ്രീകരിക്കാനാണ് രാജിവച്ചത്. ഇവിടെ തനിക്കെതിരേ വ്യാപകമായ പ്രചാരണമാണ് നടക്കുന്നതെന്നും അദ്ദേഹം വ്യക്തമാക്കി. അടുത്ത മാസം മൂന്നിന് നടക്കുന്ന രണ്ട് നിയമസഭാ സീറ്റുകളിലേക്കും മൂന്ന് ലോക്‌സഭാ സീറ്റുകളിലേക്കുമുള്ള ഉപതെരഞ്ഞെടുപ്പ് നടക്കുന്നുണ്ട്. ഇതിനുവേണ്ടി പ്രചാരണത്തിലിറങ്ങുമെന്നും അദ്ദേഹം അറിയിച്ചു.
അതേസമയം മധ്യപ്രദേശിലും രാജസ്ഥാനിലും കോണ്‍ഗ്രസുമായി സഖ്യം വേണ്ടെന്ന ബി.എസ്.പി അധ്യക്ഷ മായാവതിയുടെ പ്രഖ്യാപനമാണ് കര്‍ണാടകയില്‍ പാര്‍ട്ടി അംഗത്തിന്റെ രാജിക്ക് കാരണമെന്ന് ചൂണ്ടിക്കാണിക്കപ്പെടുന്നു.