കൊച്ചി: മെട്രോ നിര്‍മാണവുമായി ബന്ധപ്പെട്ട് ഗതാഗത നിയന്ത്രണത്തിനായി വലിച്ചുകെട്ടിയ കയറില്‍ തട്ടി നവദമ്പതികള്‍ക്ക് പരുക്ക്. ഞായറാഴ്ച്ച രാത്രി 10.30 ഓടെയാണ് സംഭവം. വയനാട് സുല്‍ത്താന്‍ബത്തേരി സ്വദേശിയും ഇപ്പോള്‍ വടുതലയില്‍ വാടകയ്ക്ക് താമസിക്കുന്ന സ്വകാര്യ സ്ഥാപനത്തിലെ ജീവനക്കാരനുമായ ദീപു (29), ഭാര്യ രോഹിണി (26) എന്നിവര്‍ക്കാണ് ഗുരുതരമായി പരുക്കേറ്റത്. ഇരുചക്രവാഹനത്തില്‍ വരികയായിരുന്ന ഇവര്‍ ഗതാഗത പരിഷ്‌കാരത്തിന്റെ ഭാഗമായി വലിച്ചുകെട്ടിയിരുന്ന കയറില്‍ തട്ടിവീഴുകയായിരുന്നു.
വൈറ്റിലയില്‍ നിന്നും താമസ സ്ഥലമായ വടുതലയിലേക്ക് വരികയായിരുന്നു ഇവര്‍. എളംകുളത്തുവച്ച് ഗതാഗത നിയന്ത്രണത്തിനായി മുന്നറിയിപ്പൊന്നുമില്ലാതെ സെക്യൂരിറ്റി വാച്ചറെപോലും നിര്‍ത്താതെ വലിച്ചുകെട്ടിയിരുന്ന കയറില്‍ കുടുങ്ങി വീഴുകയായിരുന്നു. തുടര്‍ന്ന് അതുവഴി വരികയായിരുന്ന കാര്‍ യാത്രികര്‍ ഇരുവരേയും കൊച്ചിയിലെ സ്വകാര്യ ആശുപത്രിയില്‍ എത്തിച്ചു. വീഴ്ചയുടെ ആഘാതത്തില്‍ ദീപുവിന്റെ കൈ ഒടിയുകയും തോളെല്ലിന് പരിക്കേല്‍ക്കുകയും കഴുത്ത് ഇടറുകയും ചെയ്തിട്ടുണ്ട്. ഭാര്യ രോഹിണിക്കും അപകടത്തില്‍ ഗുരുതരമായി പരുക്കേല്‍ക്കുകയും ചെയ്തു.
പരാതി നല്‍കിയിട്ടും അധികൃതരും പൊലിസും തിരിഞ്ഞുനോക്കിയില്ലെന്നും ദീപുവും രോഹിണിയും പറഞ്ഞു. മെട്രോ നിര്‍മാണം പുരോഗമിക്കുന്തോറും നഗരത്തില്‍ ഗതാഗതകുരുക്ക് ഏറിവരികയാണ്. ഇതിനിടെയാണ് കൊച്ചി മെട്രോ അധികൃതര്‍ അശാസ്ത്രീയവും അപകടകരവുമായ ഇത്തരം നടപടികള്‍.