കല്‍പ്പറ്റ: കോഴിക്കോട് സ്വദേശികളായ രണ്ടുപേരെ ഹണി ട്രാപ്പില്‍പ്പെടുത്തി പണം തട്ടാന്‍ ശ്രമിച്ച കേസില്‍ മൂന്നുപേര്‍ അറസ്റ്റില്‍. മലപ്പുറം കണ്ണമംഗലം ജലാലുദ്ദീന്‍ (24), പുഴക്കാട്ടേരി മുഹമ്മദ് ആസിഫ് അലി (22), പെരിന്തല്‍മണ്ണ പൊരുപ്പന്‍വീട് അഷ്‌റഫ് (42) എന്നിവരെയാണ് സി.ഐ കെ.ജി പ്രവീണ്‍, എസ്.ഐ സി.എ മുഹമ്മദ് എന്നിവരുടെ നേതൃത്വത്തില്‍ അറസ്റ്റ് ചെയ്തത്.
വീടും സ്ഥലവും വില്‍പനക്കുണ്ടെന്ന് പറഞ്ഞു കല്‍പ്പറ്റ എമിലിയിലെ വീട്ടില്‍ വിളിച്ചുവരുത്തി പണം തട്ടാനായിരുന്നു പ്രതികളുടെ പദ്ധതി. കോഴിക്കോട് സ്വദേശികള്‍ എത്തിയപ്പോള്‍ എമിലിയിലെ വീട്ടില്‍ രണ്ടു സ്ത്രീകളാണുണ്ടായിരുന്നത്. ഇവരുമായി സംസാരിക്കവേ ഒരു സംഘം ആളുകള്‍ വീട്ടിലെത്തി സ്ത്രീകള്‍ക്കൊപ്പം ഇരുത്തി ഫോട്ടോയെടുത്തു. ഈ ഫോട്ടോകള്‍ പരസ്യപ്പെടുത്താതിരിക്കുന്നതിനു 10 ലക്ഷം രൂപ ആവശ്യപ്പെടുകയായിരുന്നു.
തുക നല്‍കാമെന്നേറ്റ കോഴിക്കോട് സ്വദേശികള്‍ രഹസ്യമായി പൊലിസില്‍ പരാതി നല്‍കിയതാണ് പ്രതികളുടെ അറസ്റ്റിനു വഴിയൊരുക്കിയത്. സുല്‍ത്താന്‍ ബത്തേരി ജുഡിഷ്യല്‍ ഒന്നാം ക്ലാസ് മജിസ്‌ട്രേറ്റ് കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു. കേസില്‍ കൂടുതല്‍ പേരെ പിടികൂടാനുണ്ടെന്നു പൊലിസ് അറിയിച്ചു.