തിരുവനന്തപുരം: ഡബ്ല്യു.സി.സിയുടെ വെളിപ്പെടുത്തലുകളുടെ അടിസ്ഥാനത്തില്‍ സിനിമാ രംഗത്തെ പ്രശ്‌നങ്ങളില്‍ സര്‍ക്കാര്‍ ഗൗരവത്തോടെ ഇടപെടണമെന്ന് എ.ഐ.വൈ.എഫ് സംസ്ഥാന കമ്മിറ്റി. എ.എം.എം.എ എന്ന സംഘടനയുടെ സ്ത്രീവിരുദ്ധ നിലപാടുകള്‍ നേരത്തേതന്നെ സമൂഹത്തിനു ബോധ്യമായതാണെന്നും ഡബ്ല്യു.സി.സിയുടെ കഴിഞ്ഞ ദിവസത്തെ പ്രതികരണം വിഷയത്തിന്റെ ഗൗരവം വര്‍ധിപ്പിച്ചിരിക്കുകയാണെന്നും സംഘടന വാര്‍ത്താകുറിപ്പില്‍ ചൂണ്ടിക്കാട്ടി.
കുറ്റാരോപിതനായ നടനെ സംഘടനയുടെ ഭാഗമായി നിലനിര്‍ത്താനാണ് എ.എം.എം.എ നേതൃത്വം ശ്രമിക്കുന്നത്. സിനിമാ രംഗത്ത് സ്ത്രീകള്‍ക്ക് നീതി ഉറപ്പാക്കാന്‍ അഭിനേതാക്കളുടെ സംഘടനയ്ക്ക് കഴിയില്ലെന്ന് വ്യക്തമായിരിക്കുകയാണ്. നിരവധി പരാതികള്‍ ഈ രംഗത്തുനിന്ന് ഉയരുന്ന സാഹചര്യത്തില്‍ ഈ പ്രശ്‌നങ്ങള്‍ പരിഹരിക്കാന്‍ സര്‍ക്കാര്‍ സംവിധാനമൊരുക്കണമെന്നും എ.ഐ.വൈ.എഫ് സംസ്ഥാന പ്രസിഡന്റ് അഡ്വ.ആര്‍. സജിലാലും സെക്രട്ടറി മഹേഷ് കക്കത്തും ആവശ്യപ്പെട്ടു.