മേപ്പാടി: പുത്തുമല ദുരന്തത്തില്‍ കണ്ണീര്‍ക്കയത്തിലകപ്പെട്ടവര്‍ക്ക് മുന്നിലേക്ക് സാന്ത്വനസ്പര്‍ശവുമായി മുസ്‌ലിം ലീഗ് നേതാക്കളെത്തി. നഷ്ടപ്പെട്ട ഒരായുസിന്റെ സമ്പാദ്യവും കൂടെക്കൂടിയ തീരാനോവുകളും പേറി ക്യാംപുകളില്‍ കഴിയുന്നവര്‍ക്കിടയിലേക്കാണ് മുസ്‌ലിം ലീഗ് സംസ്ഥാന അധ്യക്ഷനും സമസ്ത വൈസ് പ്രസിഡന്റുമായ പാണക്കാട് സയ്യിദ് ഹൈദരലി ശിഹാബ് തങ്ങളുടെ നേതൃത്വത്തില്‍ നേതാക്കളെത്തിയത്.

അഖിലേന്ത്യാ ജനറല്‍ സെക്രട്ടറി പി.കെ കുഞ്ഞാലിക്കുട്ടി എം.പി, അഖിലേന്ത്യാ ഓര്‍ഗനൈസിങ് സെക്രട്ടറി ഇ.ടി മുഹമ്മദ് ബഷീര്‍ എം.പി, സംസ്ഥാന വൈസ് പ്രസിഡന്റ് എം.സി മായിന്‍ ഹാജി തുടങ്ങിയ നേതാക്കള്‍ക്കൊപ്പം വയനാട്ടിലെത്തിയ ഹൈദരലി തങ്ങള്‍ പുത്തുമലക്കാര്‍ താമസിക്കുന്ന മേപ്പാടി ഗവ.ഹൈസ്‌കൂളിലെ ദുരിതാശ്വാസ ക്യാംപിലേക്കാണ് ആദ്യമെത്തിയത്. തുടര്‍ന്ന് ദുരിതബാധിതര്‍ക്കായി പ്രാര്‍ഥിച്ചു. വലിയ ദുഃഖത്തിലാണ് ദുരിതബാധിതരെന്നും കിടപ്പാടവും ജീവനോപാധികളും നഷ്ടപ്പെട്ടവര്‍ക്കൊപ്പം എന്നും മുസ്‌ലിം ലീഗുണ്ടെന്നും തങ്ങള്‍ ക്യാംപംഗങ്ങളോട് പറഞ്ഞു. തുടര്‍ന്ന് സംസാരിച്ച പി.കെ കുഞ്ഞാലിക്കുട്ടി എം.പി ദുരിതബാധിതരെ ജീവിതത്തിലേക്ക് തിരിച്ചുകൊണ്ടുവരാന്‍ സാധ്യമായതെല്ലാം ചെയ്യുമെന്ന് ഉറപ്പ് നല്‍കി.

ദുരന്തബാധിത പ്രദേശങ്ങളില്‍ മുസ്‌ലിം ലീഗിന്റെയും മറ്റ് സന്നദ്ധപ്രവര്‍ത്തകരുടെയും സേവനങ്ങള്‍ തുല്യതയില്ലാത്തതാണെന്ന് ഇ.ടി മുഹമ്മദ് ബഷീര്‍ എം.പി അഭിപ്രായപ്പെട്ടു. മഴവെള്ളം കയറി വിവാഹവസ്ത്രങ്ങളടക്കം ഒലിച്ചുപോയി മേപ്പാടി സെന്റ് ജോസഫ്‌സ് യു.പി സ്‌കൂളിലെ ക്യാംപില്‍ കഴിയുന്ന ചൂരല്‍മലയിലെ പ്രതിശ്രുത വധു റാബിയക്ക് ദുബൈ കെ.എം.സി.സിയുടെ അഞ്ചുപവന്‍ സ്വര്‍ണസമ്മാനവും വിവാഹവസ്ത്രങ്ങളും ആയിരം പേര്‍ക്കുള്ള ഭക്ഷണകിറ്റുകളുടെ ഉദ്ഘാടനവും നിര്‍വഹിച്ചാണ് ലീഗ് നേതാക്കള്‍ മടങ്ങിയത്.

നേരെത്തേ മേപ്പാടി സെന്റ് ജോസഫ് ഗേള്‍സ് സ്‌കൂളിലെ ക്യാംപിലെത്തിയ നേതാക്കള്‍ ഇതര സംസ്ഥാന തൊഴിലാളികളുള്‍പ്പെടെയുള്ളവരോട് വിവരങ്ങള്‍ ചോദിച്ചറിഞ്ഞു. കെ.എസ് ഹംസ, എം.എ റസാഖ് മാസ്റ്റര്‍, ഇബ്രാഹിം എളേറ്റില്‍, പി.പി.എ കരീം, കെ.കെ അഹമ്മദ് ഹാജി, എം.എ മുഹമ്മദ് ജമാല്‍, പി.കെ അബൂബക്കര്‍, എന്‍.കെ റഷീദ്, എം.മുഹമ്മദ് ബഷീര്‍, പി.ഇസ്മാഈല്‍, എന്‍.ഡി അപ്പച്ചന്‍, റസാഖ് കല്‍പ്പറ്റ, ടി.ഹംസ, സലീം മേമന തുടങ്ങിയവര്‍ നേതാക്കള്‍ക്കൊപ്പമുണ്ടായിരുന്നു.