കൊച്ചി: അഡ്വക്കറ്റ് ജനറല്‍ സി.പി സുധാകര പ്രസാദിനെതിരേ ഉയര്‍ന്ന അഴിമതി ആരോപണത്തെക്കുറിച്ച് അന്വേഷണം നടത്തണമെന്ന് ആവശ്യപ്പെട്ട് പി.ടി തോമസ് എം.എല്‍.എ മുഖ്യമന്ത്രി പിണറായി വിജയന് കത്തു നല്‍കി.
കേരള അഭിഭാഷക ക്ഷേമനിധിയില്‍ നടന്ന ഏഴു കോടി രൂപയുടെ ക്രമക്കേടുമായി ബന്ധപ്പെട്ട് ക്ഷേമനിധിയുടെ ചെയര്‍മാന്‍ സ്ഥാനത്തു നിന്ന് അഡ്വക്കറ്റ് ജനറല്‍ സി.പി സുധാകര പ്രസാദിനെ നീക്കിക്കൊണ്ടുള്ള ബാര്‍ കൗണ്‍സില്‍ ഓഫ് ഇന്ത്യ ചെയര്‍മാന്‍ മനന്‍കുമാര്‍ മിശ്രയുടെ ഉത്തരവിന്റെ പകര്‍പ്പ് കത്തിനൊപ്പം വച്ചിട്ടുണ്ട്.
കേരള ചരിത്രത്തില്‍ തന്നെ ആദ്യമായാണ് സര്‍ക്കാരിന്റെ മുഖ്യ ഉപദേഷ്ടാവായ ഒരു അഡ്വക്കറ്റ് ജനറല്‍ ഇത്തരമൊരു വിവാദത്തില്‍ പ്രതിയാകുന്നത്. ഇതു സംബന്ധിച്ച് നിഷ്പക്ഷവും നീതിപൂര്‍വവുമായ അന്വേഷണം ഉണ്ടാകണമെന്നും കത്തില്‍ ആവശ്യപ്പെട്ടിട്ടുണ്ട്.