കൊച്ചി: നടി അക്രമിക്കപ്പെട്ട കേസില്‍ കുറ്റാരോപിതനായ ദിലീപ് താരസംഘടനയായ അമ്മയില്‍ നിന്ന് രാജിവച്ചതായി പ്രസിഡന്റ് മോഹന്‍ലാല്‍ മാധ്യമപ്രവര്‍ത്തകരോട് പറഞ്ഞു. ദിലീപിന്റെ രാജി ചോദിച്ചു വാങ്ങിയതാണെന്നും അദ്ദേഹം വ്യക്തമാക്കി. താന്‍ ആവശ്യപ്പെട്ട പ്രകാരം കഴിഞ്ഞ പത്താം തിയ്യതിയാണ് ദിലീപ് രാജിവച്ചതെന്നും അദ്ദേഹം കൂട്ടിച്ചേര്‍ത്തു. രാജിവച്ചവരെ തിരിച്ചെടുക്കണമെങ്കില്‍ പുതിയ അപേക്ഷ നല്‍കണമെന്ന് അദ്ദേഹം ചൂണ്ടിക്കാട്ടി.

സിദ്ദീഖിന്റെ വാര്‍ത്താ സമ്മേളനം പ്രസിഡന്റിന്റെ അറിവോടെയാണെന്ന് മോഹന്‍ലാല്‍ വ്യക്തമാക്കി. വാര്‍ത്താ സമ്മേളനം ജഗദീഷിന്റെ വാര്‍ത്താ കുറിപ്പിനെ കുറിച്ചറിയാതെയായിരുന്നു. അലന്‍സിയര്‍ക്കെതിരായ പരാതി അന്വേഷിക്കും. അടുത്ത എക്‌സിക്യുട്ടീവ് കമ്മിറ്റിയില്‍ തീരുമാനിക്കും. മുകേഷിനെതിരെ പരാതി ലഭിച്ചാല്‍ അന്വേഷിക്കും.

അമ്മയില്‍ ഇന്റേണല്‍ കംപ്ലെയിന്റ് സെല്‍ നിലവിലുണ്ടെന്ന് അമ്മ പ്രതിനിധികള്‍ പറഞ്ഞു. കെ.പി.എ.സി ലളിതയും പൊന്നമ്മ ബാബുവും കുക്കു പരമേശ്വരനുമാണ് അംഗങ്ങള്‍.