കോഴിക്കോട്: താമരശ്ശേരിയിൽ ഓടിക്കൊണ്ടിരുന്ന കെഎസ്ആർടിസി ബസിൽ നിന്ന് തെറിച്ച് വീണ യാത്രക്കാരിക്ക് പരിക്ക്. അമ്പലക്കുന്ന് സ്വദേശിനി സീനത്തിനാണ് അപകടത്തിൽ പരിക്കേറ്റത്.നിലമ്പൂരിൽ നിന്ന് മാനന്തവാടി വഴി ഇരിട്ടിയിലേക്ക് പോകുന്ന ബസിൽ യാത്ര ചെയ്യവെയാണ് സംഭവം. കൂടത്തായിയിൽ നിന്ന് ബസിൽ കയറിയ സീനത്ത് താമരശ്ശേരി ചുടലമുക്കിന് സമീപം രാവിലെ 8 മണിയോടെ അപകടത്തിൽപ്പെട്ടത്.

ബസ് ഓടിക്കൊണ്ടിരിക്കെ ഡോർ അപ്രതീക്ഷിതമായി തുറന്നുപോയതായാണ് റിപ്പോർട്ട്. അപകടത്തിൽ പരിക്കേറ്റ സീനത്തിനെ ഓമശ്ശേരിയിലെ സ്വകാര്യ ആശുപത്രിയിൽ പ്രവേശിപ്പിച്ചു. സംഭവത്തെ തുടർന്ന് ബസിൽ ഉണ്ടായിരുന്ന യാത്രക്കാർ ഡോർലോക്കിന്റെ തകരാറാണ് അപകടത്തിന് കാരണമെന്ന് ആരോപിച്ചു.