റിയാദ്: റിയാദ് മെട്രോയുടെയും പൊതുഗതാഗത ബസുകളുടെയും റമദാനിലെ പ്രവര്‍ത്തന സമയം പ്രഖ്യാപിച്ച് റിയാദ് പബ്ലിക് ട്രാന്‍സ്‌പോര്‍ട്ട് അധികൃതര്‍. റമദാനിൽ വെള്ളിയാഴ്ച ഒഴികെ എല്ലാ ദിവസങ്ങളിലും അര്‍ധരാത്രിക്ക് ശേഷം പുലര്‍ച്ചെ രണ്ട് മണിവരെ റിയാദ് മെട്രോ സര്‍വിസ് നടത്തും.

അതേസമയം, പൊതുഗതാഗത ബസുകള്‍ പുലര്‍ച്ചെ മൂന്നു മണിവരെ സർവിസ് നടത്തും. റമദാനില്‍ പൊതുഗതാഗതം സുഗമമാക്കാൻ ലക്ഷ്യമിട്ടാണ് പുതിയ സമയക്രമം തീരുമാനിച്ചിരിക്കുന്നതെന്ന് അധികൃതര്‍ വ്യക്തമാക്കി. വെള്ളിയാഴ്ചകളില്‍ ഉച്ചക്ക് 12 മണിക്ക് ശേഷം മാത്രമേ റിയാദ് മെട്രോ സര്‍വിസ് ആരംഭിക്കൂ. കൂടാതെ, പുലര്‍ച്ചെ മൂന്നു മണിവരെ സര്‍വിസ് നടത്തുകയും ചെയ്യും.  

ഞായര്‍ മുതല്‍ വ്യാഴം വരെയുള്ള ദിവസങ്ങളില്‍ രാവിലെ എട്ട് മണി മുതൽ റിയാദ് മെട്രോ സര്‍വിസ് ആരംഭിക്കും. ശനിയാഴ്ച രാവിലെ 10 മണിക്കാണ് സര്‍വിസ് ആരംഭിക്കുക. എല്ലാ ദിവസവും രാവിലെ 6:30 മുതല്‍ പുലര്‍ച്ചെ മൂന്നു മണിവരെ പൊതുഗതാഗത ബസുകള്‍ സര്‍വിസ് നടത്തുമെന്നും അധികൃതര്‍ വ്യക്തമാക്കി.

മക്കക്കും മദീനക്കും ഇടയില്‍ തീര്‍ഥാടകരുടെ സഞ്ചാരം എളുപ്പമാക്കുക, ആസ്വാദ്യകരമായ യാത്രാനുഭവം നല്‍കുക തുടങ്ങിയ ലക്ഷ്യങ്ങളോടെ, 2025 റമദാനില്‍ ഹറമൈന്‍ ഹൈ സ്പീഡ് ട്രെയിനിന്റെ പ്രവര്‍ത്തനം വിപുലീകരിക്കാന്‍ സഊദി റെയില്‍വേ കമ്പനി (എസ്എആര്‍) തീരുമാനിച്ചു. ഇതിന്റെ ഭാഗമായി യാത്രകളുടെയും സീറ്റുകളുടെയും എണ്ണവും വര്‍ധിപ്പിച്ചിട്ടുണ്ട്. 

ഹറമൈന്‍ ഹൈ സ്പീഡ് റെയിൽ ഓപ്പറേറ്ററായ സഊദി - സ്പാനിഷ് റെയില്‍വേ പ്രോജക്ട് കമ്പനിയുമായി സഹകരിച്ച്, സീസണിലെ സർവിസുകളുടെ എണ്ണം 3,410 ആയി ഉയർത്തിയതായി എസ്എആര്‍ വ്യക്തമാക്കി. 2024നെ അപേക്ഷിച്ച് ഇത് 21 ശതമാനം കൂടുതലാണ്. ഇതോടെ ഏകദേശം 1.6 ദശലക്ഷം സീറ്റുകള്‍ വര്‍ധിക്കും. കഴിഞ്ഞ വര്‍ഷത്തെ അപേക്ഷിച്ച് സീറ്റുകളുടെ എണ്ണത്തില്‍ 18 ശതമാനത്തിന്റെ വര്‍ധനവുണ്ടാകും. റമദാനില്‍ ഹറമൈന്‍ ഹൈ സ്പീഡ് ട്രെയിന്‍ യാത്രക്കാരുടെ എണ്ണത്തിലുണ്ടാവുന്ന വര്‍ധനവ് പരിഗണിച്ചാണ് ഈ തീരുമാനം. റമദാനിന്റെ ആദ്യ ആഴ്ചയില്‍ പ്രതിദിനം 100 ട്രിപ്പുകളുമായി പ്രതിദിന പ്രവര്‍ത്തനം ആരംഭിക്കും. പിന്നീട് മാർച്ച് 14ാം തീയതിയോടെ ഇത് പ്രതിദിനം 120 ട്രിപ്പുകളായി ഉയർത്തും, തിരക്കേറിയ ദിവസങ്ങളില്‍130 ട്രിപ്പുകൾ വരെയുണ്ടാകും.

മക്ക, ജിദ്ദ, കിംഗ് അബ്ദുല്ല ഇക്കണോമിക് സിറ്റി, കിങ് അബ്ദുല്‍ അസീസ് വിമാനത്താവളം, മദീന എന്നി സ്ഥലങ്ങളെ ബന്ധിപ്പിക്കുന്ന ഹറമൈന്‍ ഹൈ സ്പീഡ് ട്രെയിന്‍ ലോകത്തിലെ ഏറ്റവും വേഗതയേറിയ 10 ട്രെയിനുകളില്‍ ഒന്നാണ്. ഹജ്ജ്, ഉംറ തീര്‍ഥാടകര്‍ക്കും സന്ദര്‍ശകര്‍ക്കും ഈ ആധുനിക ഗതാഗത സംവിധാനം ഏറെ സഹായകമാണ്.

Riyadh Metro will extend its operating hours until 2 am during Ramadan, while buses will run until 3 am, ensuring convenient travel for residents and visitors during the holy month.