വണ്ടൂര്‍: ഗേള്‍സ് സ്‌കൂളിലെ പതിറ്റാണ്ടുകള്‍ നീണ്ട ഷിഫ്റ്റ സമ്പ്രദായം അവസാനിക്കുന്നു. തിങ്കളാഴ്ച മുതല്‍ മുഴുവന്‍ സമയം ക്ലാസുകള്‍ പ്രവര്‍ത്തിക്കും. കെട്ടിട സൗകര്യങ്ങളുടെ അഭാവവും, വിദ്യാര്‍ഥിനികളുടെ ബാഹുല്യവും കാരണം നിരവധി തവണ ശ്രമിച്ചിട്ടും നടക്കാതെ പോയ പരിഷ്‌കരണമാണ് പി.ടി എയുടേയും അധ്യാപകരുടേയും ശ്രമത്തിനൊടുവില്‍ പുതിയ അധ്യായന വര്‍ഷാരംഭത്തില്‍ ലക്ഷ്യത്തിലെത്തുന്നത്.
ജില്ലയില്‍ ഷിഫ്റ്റ് സമ്പ്രദായത്തില്‍ പ്രവര്‍ത്തിക്കുന്ന അപൂര്‍വം സ്‌കൂളുകളിലൊന്നായിരുന്നു വണ്ടൂര്‍ ഗേള്‍സ്. ഷിഫ്റ്റ് സമ്പ്രദായം കാരണം ജോലിക്കു പോകുന്ന രക്ഷിതാക്കള്‍ക്കും മറ്റും കുട്ടികളുടെ സുരക്ഷ വലിയ പ്രയാസമാണ് സൃഷ്ടിച്ചിരുന്നത്.
നിലവില്‍ അഞ്ചാം ക്ലാസ് മുതല്‍ എട്ടാം ക്ലാസ് വരെയുള്ളവര്‍ക്കാണ് രണ്ടു സമയങ്ങളിലായി ക്ലാസ് നടന്നിരുന്നത്.
മൂന്നു ഐ.ടി ലാബുകളുള്ളതില്‍ ഒന്നു ക്ലാസ് മുറിയാക്കിയും മറ്റു ക്ലാസ് മുറികളുടെ വലുപ്പം പരിമിതപെടുത്തിയുമൊക്കെയാണ് മുഴുവന്‍ സമയ ക്ലാസ് തയാറാക്കിയട്ടുള്ളത്. കെട്ടിട സൗകര്യങ്ങങ്ങളൊരുക്കാന്‍ ബന്ധപെട്ടവര്‍ കനിയുമെന്ന പ്രതീക്ഷയിലാണ് സമയമാറ്റം നടത്തിയിട്ടുള്ളതെന്ന് പി.ടി.എ പ്രസിഡന്റ് കെ.പ്രഭാകരന്‍ പറഞ്ഞു.