ന്യൂയോര്‍ക്ക്: സിറിയയിലേക്ക് അനധികൃതമായി എണ്ണ കടത്താന്‍ ശ്രമിച്ചു എന്നാരോപിച്ച് ഇറാനിയന്‍ എണ്ണക്കപ്പലായ അഡ്രിയാന്‍ ദാരിയ-1നെ യു.എസ് കരിമ്പട്ടികയില്‍ പെടുത്തി. ബഷാര്‍ അല്‍ അസദ് ഭരണകൂടത്തിനെതിരായ യൂറോപ്യന്‍ യൂനിയന്‍ ഉപരോധത്തെ മറികടന്നുകൊണ്ട് സിറിയയിലേക്ക് എണ്ണ കടത്തുകയാണെന്നതിന് വിശ്വസനീയമായ തെളിവുകള്‍ ലഭിച്ചതിന്റെ അടിസ്ഥാനത്തിലാണ് ഉപരോധമെന്ന് യു.എസ് പറയുന്നു.
മുമ്പ് ഗ്രേസ് 1 എന്നറിയപ്പെട്ടിരുന്ന ഈ കപ്പല്‍ ജൂലൈയില്‍ ജിബ്രാള്‍ട്ടറില്‍ നിന്നും ബ്രിട്ടീഷ് നാവികര്‍ പിടികൂടി ആറാഴ്ച കസ്റ്റടിയില്‍ വച്ചിരുന്നു. യൂറോപ്യന്‍ യൂണിയന്റെ ഉപരോധത്തിന് വിധേയമായ രാജ്യങ്ങളിലേക്ക് പോകില്ലെന്ന് ഇറാനില്‍ നിന്ന് രേഖാമൂലമുള്ള ഉറപ്പ് ലഭിച്ചതോടെയാണ് ജിബ്രാള്‍ട്ടര്‍ കോടതി കപ്പല്‍ വിട്ടയച്ചത്. അമേരിക്കയുടെ ശക്തമായ എതിര്‍പ്പിനെ അവഗണിച്ചുകൊണ്ടുള്ള തീരുമാനമായിരുന്നു അത്. എന്നാല്‍ വാഗ്ദാനങ്ങള്‍ നല്‍കിയിട്ടില്ലെന്ന് ഇറാന്‍ പിന്നീട് പറഞ്ഞു.
ടാങ്കര്‍ സിറിയയിലെ ടാര്‍ട്ടസിലേക്ക് പോകുന്നുണ്ടെന്ന് ഞങ്ങള്‍ക്ക് വിശ്വസനീയമായ വിവരങ്ങള്‍ ലഭിച്ചിട്ടുണ്ടെന്ന് യുഎസ് സ്റ്റേറ്റ് സെക്രട്ടറി മൈക്ക് പോംപിയോ ട്വീറ്റ് ചെയ്തു. ഈ കപ്പലിന് പിന്തുണ നല്‍കുന്ന ആര്‍ക്കെതിരെയും ഉപരോധം ഏര്‍പ്പെടുത്തിയേക്കാമെന്നും യു.എസ് ട്രഷറി പറഞ്ഞു.