ന്യൂഡല്‍ഹി: ട്രെയിനിന്റെ എ.സി കോച്ചില്‍ വീണ്ടും പാമ്പിനെ കണ്ടെത്തി. ജാര്‍ഖണ്ഡില്‍ നിന്ന് ഗോവയിലേക്കുള്ള വാസ്‌കോഡഗാമ പ്രതിവാര എക്‌സ്പ്രസ് ട്രെയിനിലെ എ.സി 2 ടയര്‍ കോച്ചിലാണ് പാമ്പിനെ കണ്ടെത്തിയത്. ഐ.ആര്‍.സി.ടി.സി ജീവനക്കാരുടെ സഹായത്തോടെ പാമ്പിനെ പിടികൂടി പുറത്തേക്ക് കൊണ്ടുപോയി.

തിങ്കളാഴ്ചയാണ് എ.സി 2ടയര്‍ കോച്ചിലെ ലോവര്‍ ബെര്‍ത്തിന്റെ കര്‍ട്ടനുകള്‍ക്ക് സമീപം പാമ്പ് ഇഴഞ്ഞുനീങ്ങുന്നത് യാത്രക്കാര്‍ കണ്ടത്. യാത്രക്കാര്‍ അറിയിച്ചതനുസരിച്ച് ഐ.ആര്‍.സി.ടി.സി ജീവനക്കാരുടെ സഹായത്തോടെ പാമ്പിനെ പിടികൂടി.

കോച്ചില്‍ തന്റെ മാതാപിതാക്കള്‍ യാത്ര ചെയ്യുന്നുണ്ടെന്നും ഉടന്‍ ഇടപെടണമെന്നും റെയില്‍വേ മന്ത്രി അശ്വിനി വൈഷ്ണവിനോട് ആവശ്യപ്പെട്ട് അങ്കിത് കുമാര്‍ എന്നയാള്‍ വിഡിയോ സഹിതം ട്വീറ്റ് ചെയ്തതോടെയാണ് ഇക്കാര്യം പുറത്തറിഞ്ഞത്.ആഴ്ചകള്‍ക്കുള്ളില്‍ ഇന്ത്യന്‍ റെയില്‍വേയില്‍ റിപ്പോര്‍ട്ട്‌ ചെയ്യുന്ന രണ്ടാമത്തെ സംഭവമാണിത്. ജബല്‍പൂരില്‍ നിന്ന് മുംബൈയിലേക്ക് പോകുകയായിരുന്ന ഗരീബ് രഥ് എക്‌സ്പ്രസിന്റെ എ.സി കോച്ചിലാണ് നേരത്തെ പാമ്പിനെ കണ്ടെത്തിയത്.