ന്യൂഡല്‍ഹി: ടി20യില്‍ ഇന്ത്യയെ മൂന്ന് ലോകകപ്പുകളില്‍ നയിച്ച ഇതിഹാസ വനിതാ ക്രിക്കറ്റ് താരം മിതാലി രാജ് ടി20 മത്സരങ്ങളില്‍നിന്ന് വിരമിച്ചു. 2021 ഏകദിന ലോകകപ്പിനായി കൂടുതല്‍ ശ്രദ്ധകേന്ദ്രീകരിക്കാനാണ് കുട്ടിക്രിക്കറ്റില്‍ നിന്നുള്ള മിതാലിയുടെ വിരമിക്കല്‍ പ്രഖ്യാപനം. 36കാരിയായ മിതാലി മൂന്ന് ടി20 ലോകകപ്പ് സഹിതം 32 മത്സരങ്ങളില്‍ ഇന്ത്യയെ നയിച്ചിട്ടുണ്ട്. 2012ല്‍ ശ്രീലങ്കയിലും 2014ല്‍ ബംഗ്ലാദേശിലും 2016ല്‍ ഇന്ത്യയിലും നടന്ന ടി20 ലോകകപ്പിലാണ് മിതാലി ഇന്ത്യയെ ചുമലിലേറ്റിയത്.
ഈ ഫോര്‍മാറ്റില്‍ ഇന്ത്യക്കായി ഏറ്റവും കൂടുതല്‍ കളിച്ച താരം കൂടിയാണ് മിതാലി. 89 മത്സരങ്ങള്‍. 2006ല്‍ ടി20യില്‍ ഇംഗ്ലണ്ടിനെതിരേ അരങ്ങേറിയ മിതാലി 2,364 റണ്‍സാണ് അടിച്ചുകൂട്ടിയത്. 97 ആണ് ഉയര്‍ന്ന സ്‌കോര്‍. ടി20യില്‍ 2000 റണ്‍സ് പിന്നിടുന്ന ആദ്യ ഇന്ത്യന്‍ താരം കൂടിയാണ്.
കഴിഞ്ഞ വര്‍ഷം നടന്ന ടി20 ലോകകപ്പിനിടെ മിതാലിയും ടീം പരിശീലകന്‍ രമേഷ് പവാറും തമ്മിലുണ്ടായ പ്രശ്‌നങ്ങള്‍ വലിയ ചര്‍ച്ചകള്‍ക്ക് വഴിമാറി. സെമിയില്‍ മിതാലിയെ കളിപ്പിക്കാതിരുന്നതോടെയാണ് പ്രശ്‌നങ്ങള്‍ വഷളായത്. തുടര്‍ന്ന് പവാറിനെതിരേ മിതാലി പരാതി നല്‍കുകയും ചെയ്തിരുന്നു. നിലവില്‍ ഇന്ത്യന്‍ ഏകദിന ടീമിന്റെ ക്യാപ്റ്റന്‍ കൂടിയാണ് മിതാലി.