തേഞ്ഞിപ്പലം: ദേശീയപാത മേലെചേളാരി അങ്ങാടിയില്‍ സീബ്രാലൈന്‍ മാഞ്ഞുപോയത് റോഡ്മുറിച്ചു കടക്കുന്നവര്‍ക്ക് ദുരിതമാകുന്നു. വിദ്യാര്‍ഥികളടക്കം ദിനേന നൂറുകണക്കിനാളുകള്‍ റോഡിന്റെ മറുകരപറ്റാന്‍ ആശ്രയിക്കുന്ന പ്രധാന ഭാഗത്തെ സീബ്രാലൈനാണ് നിറംമങ്ങിയിട്ടുള്ളത്. ഏറെ തിരക്കുപിടിച്ച പാതയായതിനാല്‍ റോഡുമുറിച്ചുകടക്കാന്‍ യാത്രക്കാര്‍ മിനിട്ടുകളോളം കാത്തുനില്‍ക്കേണ്ട അവസ്ഥയാണ്. രാവിലെയും വൈകിട്ടും ട്രാഫിക് പൊലിസിന്റെ സഹായത്തോടെയാണ് പലരും റോഡിന്റെ മറുവശത്തെത്തുന്നത്.
സീബ്രാലൈന്‍ നിറം മങ്ങിയതോടെ വെള്ളവര പലപ്പോഴും വാഹനമോടിക്കുന്നവരുടെ കണ്ണില്‍പെടുന്നില്ലെന്നതും പ്രയാസം സൃഷ്ടിക്കുന്നു. മേലെ ചേളാരി അങ്ങാടിയില്‍ ജീപ്പ് സ്റ്റാന്‍ഡിന് മുന്‍പിലുള്ള വെള്ള വരയാണ് മാസങ്ങളായി നിറം മങ്ങി നില്‍ക്കുന്നത്. അമിതവേഗതയില്‍ വരുന്ന വാഹനങ്ങളുടെ സഡന്‍ ബ്രേക്കിലാണ് പലപ്പോഴും കാല്‍നടയാത്രക്കാര്‍ രക്ഷപ്പെടുന്നത്.
സീബ്രാലൈന്‍ പുതുക്കിവരക്കാനുള്ള നടപടികള്‍ വേഗത്തിലാക്കണമെന്ന ആവശ്യം ശക്തമായിട്ടുണ്ട്.