ന്യൂഡല്‍ഹി: ഇന്ത്യന്‍ യൂനിയന്‍ മുസ്‌ലിം ലീഗിന്റെ ദേശീയ തല റമദാന്‍ റിലീഫ് പ്രവര്‍ത്തനങ്ങള്‍ ദേശീയ സെക്രട്ടറി ഇ.ടി മുഹമ്മദ് ബഷീര്‍ എം.പിയുടെ നേതൃത്വത്തില്‍ ഉത്തരേന്ത്യയുടെ വിവിധ ഭാഗങ്ങളില്‍ പുരോഗമിക്കുന്നു.
മുസഫര്‍ നഗറിലെ മന്ത്‌വാഡ ഗ്രാമത്തില്‍നിന്നു തുടങ്ങിയ റിലീഫ് പ്രവര്‍ത്തനങ്ങള്‍ സഹാറന്‍പൂര്‍, ഥാനാ ഭവന്‍ സോണ്‍ട റസൂല്‍പൂര്‍, കാണ്ട്‌ല തുടങ്ങിയ ഗ്രാമങ്ങളിലും ജാര്‍ഖണ്ഡിലെ ഗിരിഡി, ജംധാര, ദിയോഗര്‍ തുടങ്ങിയ ജില്ലയിലെ ഇരുപതോളം ഗ്രാമങ്ങളിലും എത്തി. 2013ലെ മുസഫര്‍ നഗര്‍ കലാപത്തില്‍ അഭയാര്‍ഥികളാകാന്‍ വിധിക്കപ്പെട്ട നിരവധി പേര്‍ താമസിക്കുന്ന മന്ത്‌വാഡ ഗ്രാമത്തില്‍ ആദ്യ ഘട്ടമായി 650 കിറ്റുകള്‍ വിതരണം ചെയ്തു.
ഉത്തര്‍പ്രദേശിലെ ഗ്രാമങ്ങളില്‍ അത്താഴത്തിനും നോമ്പ് തുറക്കുന്നതിനുമുള്ള ഭക്ഷണസാധനങ്ങള്‍ വിതരണം ചെയ്യുന്ന സ്ഥലങ്ങളില്‍ തിങ്ങിക്കൂടിയവരില്‍ പിഞ്ചുകുഞ്ഞുങ്ങള്‍ മുതല്‍ അരക്കുതാഴേക്ക് ചലനശേഷിയില്ലാത്തവരും നടുവൊടിഞ്ഞ വയോധികരുമെല്ലാം ഉണ്ടായിരുന്നു.
പട്ടിണിയുടെ കാഠിന്യം കാരണം വൈകല്യം ബാധിച്ചവരടക്കം ആബാലവൃദ്ധം മനുഷ്യര്‍ പരാതികളുമായി മുസ്‌ലിം ലീഗ് റിലീഫ് സംഘത്തെ പൊതിഞ്ഞു. ഗ്രാമീണരുടെ മുഖ്യ പ്രശ്‌നം കുടിവെള്ളമാണ്.
രണ്ടും മൂന്നും കിലോമീറ്റര്‍ താണ്ടിയിട്ട് വേണം വെള്ളം ശേഖരിക്കാന്‍. ഒഴുക്ക് നിലച്ച മലിനമായ നദിയിലെ വെള്ളമാണ് കുടിക്കാനും പ്രാഥമികാവശ്യങ്ങള്‍ക്കും ഇവര്‍ ഉപയോഗിക്കുന്നത്. ജാര്‍ഖണ്ഡിലെ പ്രാദേശിക മുസ്‌ലിം ലീഗ് പ്രവര്‍ത്തകരുടെ അഭ്യര്‍ഥന പരിഗണിച്ച് ഒരു ഗ്രാമത്തില്‍ ഒന്ന് എന്ന തോതില്‍ 12 കുഴല്‍ക്കിണര്‍ നിര്‍മിച്ചു നല്‍കാന്‍ റിലീഫ് പ്രവര്‍ത്തനങ്ങളുടെ ഭാഗമായി തീരുമാനിച്ചിട്ടുണ്ട്. 12 ലക്ഷം രൂപയാണ് ഇതിനായി ചെലവഴിക്കുക. പ്രാദേശിക മുസ്‌ലിം ലീഗ് പ്രവര്‍ത്തകര്‍ റിലീഫ് സംഘത്തേയും കൂട്ടി മസ്ജിദിലെത്തിയപ്പോള്‍ അവിടെ ടോയ്‌ലറ്റ് സൗകര്യപോലുമില്ലായിരുന്നു. ടോയ്‌ലറ്റോ, ഉറച്ച മേല്‍ക്കൂരയോ ഇല്ലാത്ത മസ്ജിദുകളാണ് ഗ്രാമത്തിലധികവും.
ഷഫീഖ് മാങ്കാവ്, ഹജാസ് പൊക്കുന്ന്, അബ്ദുല്‍ റഷീദ് മൂര്‍ക്കനാട്, അബ്ദുല്‍ ലത്തീഫ് രാമനാട്ടുകര, ഖാലിദ് കരുവാരകുണ്ട്, വാജിദ് കൊയിലാണ്ടി, അഷ്‌റഫ് പാറോല്‍, സുഫൈദ് തങ്ങള്‍ കുറ്റ്യാടി, അഹ്‌സന്‍ കരുവാരകുണ്ട് തുടങ്ങിയവര്‍ ജാര്‍ഖണ്ഡ് സന്ദര്‍ശന സംഘത്തിലുണ്ടായിരുന്നു.മത്വ്‌ലൂബ് സഹാറന്‍പൂര്‍, മുഹമ്മദ് ഹലീം, റശീദ് ഒളവണ്ണ, സലീല്‍, തുഫൈല്‍ തങ്ങള്‍ കുറ്റ്യാടി, സയ്യാര്‍ പ്രധാന്‍, മുഹമ്മദ് ഹസന്‍ റാണ, ഹാഫിസ് സയ്യാര്‍ അലി തുടങ്ങിയവര്‍ സംഘത്തിലുണ്ടായിരുന്നു.