തൃശൂര്‍: നാം ജീവിക്കുന്നത് ഭീകരരായ മനുഷ്യരുടെ കാലത്താണെന്ന് കവി സച്ചിദാനന്ദന്‍. ഭീകരരായ ദൈവങ്ങളെ സൃഷ്ടിച്ചുകൊണ്ടിരിക്കുന്ന കാലമാണിപ്പോള്‍. വിവിധ മതങ്ങളില്‍പ്പെട്ട ചെറിയ വിഭാഗം ആളുകള്‍ അവരുടെ മതത്തില്‍ വിശ്വസിക്കുകയും ഇതരമതങ്ങളെ വെറുക്കുകയും എല്ലാ മനുഷ്യരും തങ്ങളെ അനുസരിക്കണമെന്ന കാലഘട്ടത്തിലാണ് സാഹിത്യവും പ്രതിരോധത്തെക്കുറിച്ചും സംസാരിക്കുന്നതെന്ന് അദ്ദേഹം കൂട്ടിച്ചേര്‍ത്തു.
സാഹിത്യ അക്കാദമിയുടെ അറുപതാം വാര്‍ഷികാഘോഷ ചടങ്ങില്‍ സാഹിത്യവും പ്രതിരോധവുമെന്ന സെമിനാറില്‍ പ്രബന്ധാവതരണം നടത്തുകയായിരുന്നു സച്ചിദാനന്ദന്‍.
അനേകം സ്വരങ്ങളിലൂടെയാണ് ഒരോ കൃതിയെയും ഒരോ ആളുകള്‍ കാണുന്നത്. ചിലര്‍ ആസ്വാദനരീതിയിലും ആക്രമരീതിയിലും കാണുന്നു.
സത്യം പറയാന്‍ ധൈര്യപ്പെടാതെ നുണകളെ താങ്ങി നിര്‍ത്താനും സ്വാതന്ത്ര്യത്തിന്റെ അവകാശങ്ങളെ നിരാകരിക്കാനും മടിയില്ലാത്തവരായ സമകാലീന ഇന്ത്യന്‍ സമൂഹം രൂപപ്പെട്ടു തുടങ്ങിയെന്ന് കവി സച്ചിദാനന്ദന്‍ പറഞ്ഞു.
ജനം മൗനത്തിന്റെ ഗൂഡാലോചനയില്‍ മുഴുകി കഴിയുന്ന സാമൂഹികാന്തരീക്ഷമാണ് നിലനില്‍ക്കുന്നത്. അധികാരത്തോട് സത്യം സംസാരിക്കാനുള്ള കാതലാണ് യഥാര്‍ത്ഥ പ്രതിരോധം.
സമൂഹത്തിലും സാഹിത്യത്തിലും പല കാലത്തും ഇത്തരമൊരു പ്രവണത പലരീതിയിലാണ് പ്രകടമായിട്ടുള്ളത്. അനീതിക്കെതിരേ കലാപം ചെയ്യുക എന്ന മുദ്രാവാക്യം പോലും ഈ വിധം രൂപപ്പെട്ടതെന്നും സച്ചിദാനന്ദന്‍ ചൂണ്ടിക്കാട്ടി.
അധികാരത്തോട് സത്യം സംസാരിക്കുന്നതാണ് പ്രതിരോധം. ചിലപ്പോള്‍ നിങ്ങള്‍ ഒറ്റപ്പെടും. എന്നാലും സത്യത്തെ ഉയര്‍ത്തിപ്പിടിക്കണം. എഴുത്തുകാരനെയും കലാകാരനെയും ഒന്നിപ്പിക്കുന്നതാണ് സാഹിത്യം. സത്യം പറയാനുള്ള പ്രതിജ്ഞാ ബദ്ധതയില്‍ നിന്നാണ് ഒരു പക്ഷേ സാഹിത്യം അതിന്റെ പ്രതിരോധ ഊര്‍ജം ആരംഭിക്കുന്നതെന്നും അദ്ദേഹം പറഞ്ഞു.
അക്കാദമി നിര്‍വാഹക സമിതിയംഗം ഇ.പി. രാജഗോപാലന്‍ മോഡറേറ്ററായിരുന്നു. ഖദീജ മുംതാസ്, ഡോ. മ്യൂസ് മേരി ജോര്‍ജ്, ജയമോഹന്‍, ചന്ദ്രമതി, കെ.ഇ.എന്‍ കുഞ്ഞഹമ്മദ്, മങ്ങാട് ബാലചന്ദ്രന്‍ തുടങ്ങിയവര്‍ പങ്കെടുത്തു.