വാഷിങ്ടന്‍: യുഎസ് പ്രസിഡന്റ് ഡോണാള്‍ഡ് ട്രംപിന്റെ ഭാര്യ മെലനിയ ട്രംപും അവരുടെ മകന്‍ ബാറോണും ഒടുവില്‍ വൈറ്റ് ഹൗസിലേക്ക് താമസം മാറി. ട്രംപ് അധികാരത്തിലെത്തി ആറു മാസത്തിനു ശേഷമാണ് ഭാര്യയും പതിനൊന്നുകാരനായ മകനും വൈറ്റ് ഹൗസിലേക്ക് സ്ഥിരതാമസത്തിനെത്തുന്നത്.

മകന്‍ ബാറോണിന്റെ പഠനവുമായി ബന്ധപ്പെട്ട് മെലനിയ ന്യൂയോര്‍ക്കിലായിരുന്നു ഇതുവരെ താമസിച്ചിരുന്നത്. പഠനം പൂര്‍ത്തിയായതോടെ ഇരുവരും വൈറ്റ് ഹൗസിലേക്ക് താമസം മാറുകയായിരുന്നു.

ട്രംപിനൊപ്പമാണ് ഇരുവരും വൈറ്റ് ഹൗസിലേക്ക് എത്തിയത്. വൈറ്റ് ഹൗസില്‍ എത്തിയതിനുശേഷം ജനല്‍വാതിലിലൂടെ പുറത്തേക്കുള്ള ചിത്രം മെലനിയ ട്വീറ്റ് ചെയ്തിരുന്നു.

അധികാരത്തിലെത്തി ഇത്രയും വൈകി വൈറ്റ് ഹൗസില്‍ എത്തിയ പ്രഥമ വനിത യുഎസിന്റെ ചരിത്രത്തില്‍ അടുത്തൊന്നും ഉണ്ടായിട്ടില്ല.