ഇസ്താംബൂള്‍: റിപ്പബ്ലിക്ക് ദിനത്തില്‍ ലോകത്തിനു പുതിയ എയര്‍പോര്‍ട്ട് സമ്മാനിച്ച് തുര്‍ക്കി. ലോകത്തിലെ ഏറ്റവും വലിയ വ്യോമയാന ഹബ്ബുകളില്‍ ഒന്നാണ് ഇസ്താംബൂള്‍. 90 മില്യണ്‍ യാത്രക്കാരെ ഉള്‍കൊള്ളാന്‍ വിശാലതയുള്ള പുതിയ എയര്‍പോര്‍ട്ട് തുര്‍ക്കി വികസനത്തില്‍ വഴിത്തിരിവാകും. ഇതോടെ ലോകത്തെ ഏറ്റവും വലിയ മൂന്നാമത്തെ എയര്‍പോര്‍ട്ടായി ഇസ്താംബൂള്‍ അറിയപ്പെടും.

തുര്‍ക്കിയുടെ 95ാമത് റിപ്പബ്ലിക്ക് വാര്‍ഷികാഘോഷ ചടങ്ങില്‍ 50 ലധികം വിദേശ നേതാക്കള്‍, മന്ത്രിമാര്‍, ഉദ്യോഗസ്ഥര്‍ തുടങ്ങിയവര്‍ സംബന്ധിച്ചു. പുതിയ എയര്‍പോര്‍ട്ട് 'ഇസ്താംബൂള്‍ എയര്‍പോര്‍ട്ട്' എന്ന പേരില്‍ അറിയപ്പെടും. 2018 ഓടെ എയര്‍പോര്‍ട്ടിന്റെ എല്ലാ ഘട്ടങ്ങളും പൂര്‍ത്തിയാകുന്നതോടെ ലോകത്തിലെ നമ്പര്‍ വണ്‍ എയര്‍പോര്‍ട്ട് എന്ന പദവിയിലേക്ക് ഇസ്താംബൂള്‍ എയര്‍പോര്‍ട്ട് ഉയര്‍ത്തപ്പെടും.

'പുതിയ എയര്‍പോര്‍ട്ട് തുര്‍ക്കിക്ക് മാത്രമല്ല, നമ്മുടെ മേഖലക്കപ്പുറം ലോകത്തിനും വേണ്ടി നടത്തുന്ന നിക്ഷേപമാണെന്നു' പ്രസിഡന്റ് ഉര്‍ദുഗാന്‍ പറഞ്ഞു. നിര്‍മ്മാണവും പ്രവര്‍ത്തനവും, ബജറ്റും കൊണ്ട് ലോകത്തിനു മാതൃകയായി ഇസ്താംബൂള്‍ എയര്‍പോര്‍ട്ട് മാറുമെന്ന് അദ്ദേഹം കൂട്ടിച്ചേര്‍ത്തു.

നിലവിലെ അത്താതുര്‍ക്ക് എയര്‍പോര്‍ട്ട് പരിശീലന പ്രവര്‍ത്തനങ്ങള്‍, വ്യോമയാന പ്രദര്‍ശനങ്ങള്‍, തുടങ്ങിയ മറ്റു പൊതു ഉപയോഗങ്ങള്‍ക്കു വേണ്ടി ഉപയോഗിക്കും. ഏഷ്യന്‍ ഭാഗത്തുള്ള 'സാബിഹ'യാണ് ഇസ്താംബൂളിലെ രണ്ടാമത്തെ എയര്‍പോര്‍ട്ട്
ഏകദേശം മൂന്ന് വര്‍ഷത്തിനുള്ളില്‍ പൊതുസ്വകാര്യ പങ്കാളിത്തത്തോടെ 7.2 ബില്യണ്‍ ഡോളറിന്റെ നിക്ഷേപത്തിലാണ് ആദ്യഘട്ടം പൂര്‍ത്തീകരിച്ചത്. തുര്‍ക്കിയുടെ നൂറാം വര്‍ഷ ആഘോഷത്തിന്റെ ഭാഗമായി പ്രൊജക്റ്റ് 2023 ന്റെ പ്രധാന ലക്ഷ്യങ്ങളില്‍ ഒന്നായിരുന്നു ഇസ്താംബൂള്‍ എയര്‍പോര്‍ട്ട്.

ആറു റണ്‍വെയില്‍ നാലു ഘട്ടങ്ങളിലായി പണി പൂര്‍ത്തീകരിച്ചു കൊണ്ട് 300ഓളം സ്ഥലങ്ങളില്‍ നിന്നും 100 ലധികം എയര്‍ലൈന്‍സുകളെ ഉള്‍ക്കൊള്ളുന്ന ആഗോള വ്യോമയാന കേന്ദ്രമായി 2028ഓടെ ഇസ്താംബൂള്‍ മാറുമെന്നാണ് കണക്കുകൂട്ടല്‍.