നൂര്‍ സുല്‍ത്താന്‍ (കസാകിസ്ഥാന്‍): ലോക ഗുസ്തി ചാംപ്യന്‍ഷിപ്പില്‍ ഇന്ത്യയുടെ ബജ്‌റംഗ് പൂനിയക്കും രവി കുമാര്‍ ദാഹിയക്കും വെങ്കലം. നേരത്തേ ഇരുവരും സെമിയിലെത്തിയതോടെ ഒളിംപിക് ബെര്‍ത്ത് നേടിയിരുന്നു. അതേസമയം, ഇന്ത്യയുടെ ഒളിംപിക് മെഡല്‍ ജേതാവ് സുശീല്‍ കുമാര്‍ ആദ്യ റൗണ്ടില്‍ തന്നെ തോറ്റുപുറത്തായി.
85 കിലോ ഫ്രീസ്റ്റൈല്‍ വിഭാഗത്തിലെ വെങ്കലമെഡല്‍ പോരാട്ടത്തില്‍ മംഗോളിയയുടെ തുല്‍ഗ തോമര്‍ ഒച്ചിരിനെ 8-7നാണ് ബജ്‌റംഗ് പരാജയപ്പെടുത്തിയത്. ഇതോടെ ലോക ഗുസ്തി ചാംപ്യന്‍ഷിപ്പില്‍ മൂന്ന് മെഡല്‍ നേടുന്ന ആദ്യ ഇന്ത്യന്‍ താരമായി ഈ ഹരിയാനക്കാരന്‍ മാറി. 2013ലെ ബുദ്ധാപെസ്റ്റ് ചാംപ്യന്‍ഷിപ്പില്‍ 60 കിലോ വിഭാഗത്തില്‍ വെങ്കലം നേടിയ ബജ്‌റംഗ്, കഴിഞ്ഞ വര്‍ഷം ഇവിടെ തന്നെ നടന്ന ചാംപ്യന്‍ഷിപ്പില്‍ 65 കിലോയില്‍ മത്സരിച്ച് വെള്ളിയും കരസ്ഥമാക്കിയിരുന്നു. തുടക്കത്തില്‍ 0-6ന് പിന്നില്‍ നിന്ന ശേഷമായിരുന്നു നിലവിലെ ലോക ഒന്നാം നമ്പര്‍ താരത്തിന്റെ ഒന്നാന്തരമൊരു തിരിച്ചുവരവ്.
തന്റെ അരങ്ങേറ്റ ചാംപ്യന്‍ഷിപ്പിലാണ് രവി കുമാര്‍ മെഡല്‍ സ്വന്തമാക്കിയത്. 57 കിലോ ഫ്രീസ്റ്റൈലിലിലെ വെങ്കല മെഡല്‍ പോരാട്ടത്തില്‍ നിലവിലെ ഏഷ്യന്‍ ചാംപ്യന്‍ ഇറാന്റെ റീസ അത്രിക്കെതിരേ 6-3നായിരുന്നു ജയം.
ഇതോടെ ചാംപ്യന്‍ഷിപ്പില്‍ ഇന്ത്യയുടെ മെഡല്‍ നേട്ടം മൂന്നായി. നേരത്തേ വിനേഷ് ഫോഗട്ട് ഇന്ത്യക്കായി ആദ്യ മെഡല്‍ നേടിയിരുന്നു. അതേസമയം, അസര്‍ബൈജാന്റെ ഖാദ്ഷിമുറാദ് ഗദ്‌സിയേവിനോട് 11-9നാണ് സുശീല്‍ പരാജയപ്പെട്ടത്.