ഫറോക്ക്: അന്യായമായി അടച്ചുപൂട്ടിയ ചെറുവണ്ണൂരിലെ മലബാര്‍ ഓട്ടുകമ്പനി തുറന്നു പ്രവര്‍ത്തിപ്പിക്കാത്തതില്‍ പ്രതിഷേധിച്ച് തൊഴിലാളികള്‍ കമ്പനി ഉടമയുടെ വീടിനു മുന്നില്‍ കൂട്ടധര്‍ണ നടത്തി.
പയ്യാനക്കല്‍ വൈ.എം.ആര്‍.സി റോഡില്‍ താമസിക്കുന്ന ഡോ. കെ.വി രഞ്ജിത്തിന്റെ വീട്ടുപടിക്കലിലാണ് പ്രതിഷേധ പ്രകടനവും കൂട്ടധര്‍ണയും നടത്തിയത്.
കമ്പനിക്ക് മുന്നില്‍ തൊഴിലാളികള്‍ നടത്തിവരുന്ന കുത്തിയിരിപ്പു സമരം 133-ാം ദിവസത്തിലേക്ക് കടന്നതോടെ സമരം കൂടുതല്‍ ശക്തമാകുന്നതിന്റെ ഭാഗമായാണ് കമ്പനി ഉടമയുടെ വീടിനു മുന്നില്‍ സംയുക്ത ട്രേഡ് യൂനിയനുകളുടെ നേതൃത്വത്തില്‍ സമരം നടത്തിയത്.
ധര്‍ണ സി.ഐ.ടി.യു ജില്ലാ വൈസ് പ്രസിഡന്റ് പി. സുബ്രമണ്യന്‍ നായര്‍ ഉദ്ഘാടനം ചെയ്തു. കെ.പി സോമസുന്ദരന്‍ അധ്യക്ഷനായി. മീഞ്ചന്തയില്‍ നിന്നാരംഭിച്ച പ്രകടനം പയ്യാനക്കല്‍ ഉടമയുടെ വീട്ടുപടിക്കലില്‍ സമാപിച്ചു.
വിവിധ ട്രേഡ് യൂനിയനുകളെ പ്രതിനിധീകരിച്ച് പി. ചന്തുക്കുട്ടി, ബിജുലാല്‍, മേലടി നാരായണന്‍, എം. മുസ്തഫ, എം. സതീഷ് കുമാര്‍, പി. ഹംസ, സതീഷന്‍, ഇ. രാമദാസന്‍ സംസാരിച്ചു. കെ. കൃഷ്ണന്‍ സ്വാഗതവും എം.കെ മോഹന്‍കുമാര്‍ നന്ദിയും പറഞ്ഞു.