കൊച്ചി: പിറവം സെന്റ് മേരീസ് പള്ളിയില്‍ സുപ്രിം കോടതി വിധി നടപ്പാക്കാനുള്ള തടസ്സങ്ങള്‍ നീക്കി കോടതി ഉത്തരവ് നടപ്പാക്കണമെന്ന് ഹൈക്കോടതി. പള്ളിക്കകത്ത് തമ്പടിച്ചിരിക്കുന്ന മുഴുവന്‍ പേരെയും അറസ്റ്റ് ചെയ്ത് മാറ്റണമെന്നും കോടതി ഉത്തരവ് നടപ്പാക്കി ഇന്ന് ഉച്ചയ്ക്ക് 1.45 ഓടെ ഹൈക്കോടതിയെ അറിയിക്കണമെന്നും കോടതി അന്ത്യശാസന നല്‍കിയിരിക്കുകയാണ്.
സംഘര്‍ഷാവസ്ഥ കണക്കിലെടുത്ത് ഇവിടെ നിരോധനാജ്ഞ പ്രഖ്യാപിച്ചിരുന്നു. പ്രാര്‍ഥനക്കായി പള്ളിയില്‍ പ്രവേശിക്കാന്‍ ഓര്‍ത്തഡോക്സ് വിഭാഗം എത്തിയതോടെയാണ് സംഘര്‍ഷാവസ്ഥ ഉടലെടുത്തത്. അതേസമയം, ഓര്‍ത്തഡോക്സ് വിഭാഗത്തെ പള്ളിയില്‍ പ്രവേശിക്കാന്‍ ആനുവദിക്കില്ലെന്ന നിലപാടില്‍ ഉറച്ചു നില്‍ക്കുകയാണ് യാക്കോബായ വിഭാഗം. സ്ഥലത്ത് സംഘര്‍ഷാവസ്ഥ നിലനില്‍ക്കുന്നതിനാല്‍ വന്‍ പൊലിസ് സന്നാഹത്തെയും ഏര്‍പെടുത്തിയിട്ടുണ്ട്.

സുപ്രിം കോടതി വിധിപ്രകാരം ആരാധനയ്‌ക്കെത്തുന്നവരെ പിറവം സെന്റ് മേരീസ് പള്ളിയില്‍ പ്രവേശിക്കുന്നതില്‍ നിന്ന് തടയില്ലെന്ന് യാക്കോബായ മലബാര്‍ ഭദ്രാസനാധിപന്‍ സക്കറിയാ മാര്‍ പോളി കാര്‍പസ്. എന്നാല്‍, ആരാധനയുടെ പേരില്‍ എവിടെ നിന്നെങ്കിലും വരുന്നവര്‍ക്ക് പള്ളിയില്‍ പ്രവേശിക്കാനാകില്ലെന്നും അദ്ദേഹം വ്യക്തമാക്കി.

അതേസമയം, പള്ളിയില്‍ പ്രവേശിക്കാന്‍ ഓര്‍ത്തഡോക്‌സ് വിഭാഗത്തിന്റെ ശ്രമം രണ്ടാം ദിവസവും തുടരുകയാണ്. ഇന്നലെ രാത്രി മുതല്‍ ഓര്‍ത്തഡോക്‌സ് വിഭാ?ഗം പള്ളിക്ക് മുന്നില്‍ തന്നെ നിലയുറച്ചിരിക്കുകയാണ്. പള്ളിക്ക് മുന്നില്‍ പന്തല്‍ക്കെട്ടിയാണ് ഓര്‍ത്തഡോക്‌സ് വിഭാ?ഗക്കാര്‍ പ്രതിഷേധിക്കുന്നത്. ഇതുകൂടാതെ, വിധി നടപ്പാക്കുന്നതില്‍ പോലീസ് പരാജയപ്പെട്ടന്ന് ആരോപിച്ച് ഓര്‍ത്തഡോക്‌സ് വിഭാഗം നല്‍കിയ ഹര്‍ജി ഹൈക്കോടതി ഇന്ന് പരിഗണിക്കും.