രാജാക്കാട്: ആശുപത്രിയില്‍ ഡോക്ടറുടെ അഭാവത്തെ തുടര്‍ന്ന് രോഗികള്‍ക്ക് മരുന്ന് നല്‍കുന്നത് അറ്റന്റര്‍. ദിവസേന അന്‍പതിലധികം രോഗികള്‍ ചികിത്സ തേടിയെത്തുന്ന കുഞ്ചിത്തണ്ണി ഗവ. ഹോമിയോ ആശുപത്രിയിലാണ് കഴിഞ്ഞ ഒരുമാസമായി ഡോക്ടറില്ലാത്തത്. ഡോക്ടറുടെ അഭാവത്തിലാണ് ഇവിടെയെത്തുന്ന രോഗികള്‍ക്ക് അറ്റന്റര്‍ മരുന്ന് നല്‍കുന്നത്. രണ്ട്മാസം മുമ്പാണ് കുഞ്ചിത്തണ്ണി ഗവ. ഹോമിയോ ആശുപത്രിയില്‍ ഡോക്ടറെ നിയമിച്ചത്. എന്നാല്‍ കഴിഞ്ഞ ഒരുമാസക്കാലമായി ഇവിടെയെത്തുന്ന രോഗികള്‍ക്ക് ഡോക്ടറുടെ സേവനം ലഭിക്കുന്നില്ല. രോഗികള്‍ ചികിത്സ ലഭിയ്ക്കാതെ മടങ്ങുന്ന അവസ്ഥയാണ് ഇപ്പോഴുള്ളത്.
പകര്‍ച്ചപനിയിടക്കം പടര്‍ന്ന് പിടിയ്ക്കുന്ന സാഹചര്യത്തില്‍ എത്രയും പെട്ടന്ന് ഡോക്ടറുടെ സേവനം ലഭ്യമാക്കുന്നതിന് വേണ്ട നടപടി സ്വീകരിക്കണമെന്നാണ് നാട്ടുകാരുടെ ആവശ്യം.