കോട്ടയം: പാലാ ഉപതെരഞ്ഞെടുപ്പില്‍ എവിടെയാണ് തെറ്റുപറ്റിയതെന്ന് അന്വേഷിക്കുമെന്ന് ഉമ്മന്‍ ചാണ്ടി. തെറ്റ് തിരുത്തി മുന്നോട്ട് പോകുമെന്നും അദ്ദേഹം പറഞ്ഞു. പ്രഥമ ദൃഷ്ട്യാ കഴിഞ്ഞ മൂന്ന് തെരഞ്ഞെടുപ്പുകളില്‍ നിന്നും ബി.ജെ.പിക്ക് ലഭിച്ച വോട്ട് വളരെയധികം കുറഞ്ഞുപോയിട്ടുണ്ട്.
പരാജയത്തില്‍ ഒരിക്കലും കോണ്‍ഗ്രസ് പതറില്ല. പ്രതീക്ഷിക്കാത്ത പരാജയമാണ് ഉണ്ടായതെന്ന് സമ്മതിക്കുന്നു. എന്നാല്‍ ഐക്യജനാധിപത്യ മുന്നണിക്ക് ശക്തമായ അടിത്തറയാണ് കേരളത്തില്‍ ഒട്ടാകെ ഉള്ളത്. അതിന് തെളിവാണ് പാര്‍ലമെന്റ് തെരഞ്ഞെടുപ്പില്‍ ഇരുപതില്‍ 19സീറ്റും കോണ്‍ഗ്രസിന് നേടാന്‍ സാധിച്ചത്'- ഉമ്മന്‍ ചാണ്ടി പറഞ്ഞു.

വോട്ട് മറിച്ചുവെന്ന കാര്യത്തിലും കേരള കോണ്‍ഗ്രസിലെ ഭിന്നത അടക്കമുള്ളവയിലും വിശദമായ അന്വേഷണം നടത്തുമെന്നും ഉമ്മന്‍ ചാണ്ടി പറഞ്ഞു.
മുന്നണിക്കകത്തെ പാര്‍ട്ടികള്‍ തമ്മില്‍ മത്സരം പാടില്ല എന്ന പാഠം പാലാ തെരഞ്ഞെടുപ്പ് കോണ്‍ഗ്രസിനെ പഠിപ്പിക്കുന്നുവെന്ന് യു.ഡി.എഫ് കണ്‍വീനര്‍ ബെന്നി ബെഹനാന്‍. അത് ഗൗരവമായിട്ടെടുക്കാന്‍ രാഷ്ട്രീയ നേതൃത്വം തയ്യാറാകണം എന്ന അഭിപ്രായമാണ് തനിക്ക് ഉള്ളതെന്നും ബെന്നി ബഹനാന്‍ പറഞ്ഞു. പാലായില്‍ യുഡിഎഫും എല്‍ഡിഎഫും തമ്മിലായിരുന്നു മത്സരമെന്നും അദ്ദേഹം വ്യക്തമാക്കി.