ന്യൂഡല്‍ഹി: രാജ്യത്തു നടന്ന ഉപതെരഞ്ഞെടുപ്പില്‍ ബി.ജെ.പിയും കോണ്‍ഗ്രസും നേര്‍ക്കുനേര്‍ ഏറ്റുമുട്ടിയ മണ്ഡലങ്ങളില്‍ തിരിച്ചുവരവിന്റെ പ്രതീക്ഷയുണര്‍ത്തി കോണ്‍ഗ്രസ്. ചത്തീസ്ഗഢിലെ ദണ്ഡേവാഡ നിയമസഭാ സീറ്റ് ബി.ജെ.പിയില്‍ നിന്ന് കോണ്‍ഗ്രസ് തിരിച്ചുപിടിച്ചു. കോണ്‍ഗ്രസ് സ്ഥാനാര്‍ഥി ദേവി കര്‍മ 11,331 വോട്ടുകള്‍ക്കാണ് ബി.ജെ.പിയുടെ ഓജസ്വി മണ്ഡവിയെ പരാജയപ്പെടുത്തിയത്.

ത്രിപുരയിലെ ബാധര്‍ഘട്ട് നിയമസഭാ മണ്ഡലത്തില്‍ ബി.ജെ.പിയാണ് ജയിച്ചതെങ്കിലും വോട്ട് വിഹിതത്തില്‍ 18 ഇരട്ടി വര്‍ധനയാണ് കോണ്‍ഗ്രസിനുണ്ടായത്. മുന്‍പ് സംസ്ഥാനം ഭരിച്ചിരുന്ന സി.പി.എമ്മിനും ബി.ജെ.പിക്കും വലിയ വോട്ടുചോര്‍ച്ചയുണ്ടായി.

ഫെബ്രുവരിയില്‍ നടന്ന തെരഞ്ഞെടുപ്പില്‍ കോണ്‍ഗ്രസ് സ്ഥാനാര്‍ഥി രത്തന്‍ചന്ദ്ര ദാസിന് 505 വോട്ടുകള്‍ മാത്രമാണ് ലഭിച്ചിരുന്നത്. ഇപ്രാവശ്യം അത് 9105 ആയി ഉയര്‍ത്താനായി. വിജയിച്ച ബി.ജെ.പി സ്ഥാനാര്‍ഥിക്ക് 20,487 വോട്ടുകളാണ് ലഭിച്ചത്. രണ്ടാമതായ സി.പി.എം സ്ഥാനാര്‍ഥി ബുള്‍തി ബിശ്വാസിന് 15,211 വോട്ടുകളും ലഭിച്ചു.

കോണ്‍ഗ്രസ് ഭരിക്കുന്ന ചത്തീസ്ഗഢില്‍ ബി.ജെ.പിയും കോണ്‍ഗ്രസും ആയിരുന്നു പ്രധാന എതിരാളികള്‍. ഈ വര്‍ഷം ഏപ്രിലില്‍ മാവോയിസ്റ്റ് ആക്രമണത്തില്‍ സിറ്റിങ് ബി.ജെ.പി എം.എല്‍.എ ഭീമ മാണ്ഡവി കൊല്ലപ്പെട്ടതിനെ തുടര്‍ന്നാണ് ദന്തേവാഡയില്‍ ഉപതെരഞ്ഞെടുപ്പ് നടന്നത്. കോണ്‍ഗ്രസ് സ്ഥാനാര്‍ത്ഥി ദേവി കര്‍മ മികച്ച ഭൂരിപക്ഷത്തിലാണ് ഇവിടെ വിജയിച്ചത്. കൊല്ലപ്പെട്ട കോണ്‍ഗ്രസ് നേതാവ് മഹേന്ദ്ര കര്‍മയുടെ ഭാര്യയാണ് ദേവി കര്‍മ.

ദന്തേവാഡ കൂടി പിടിച്ചതോടെ ബസ്തറിലെ 12 സീറ്റുകളും കോണ്‍ഗ്രസ് സ്വന്തമാക്കി. വിജയത്തോടെ 90 അംഗ ഛത്തീസ്ഗഢ് നിയമസഭയില്‍ കോണ്‍ഗ്രസ് എം.എല്‍.എമാരുടെ അംഗബലം 68 ല്‍ നിന്ന് 69 ആയി ഉയരും.