വടകര: വിദ്യാഭ്യാസ ജില്ലയില്‍ നടപ്പാക്കി വരുന്ന പരിസ്ഥിതി സംരക്ഷണ വിദ്യാഭ്യാസ പദ്ധതിയായ സേവിന്റെ 'നാട്ടുമാ മഹോത്സവം' പരിപാടിക്കു തുടക്കമായി. നാട്ടുമാവ്, പ്ലാവ്, പുളി തുടങ്ങിയ നാട്ടുമരങ്ങള്‍ വച്ചുപിടിപ്പിക്കുന്ന പദ്ധതിയാണിത്.
പെട്ടെന്നു വളര്‍ന്നു പന്തലിക്കുന്ന ബലമില്ലാത്ത മരങ്ങള്‍ക്കു പകരം വിത്തായും കായായും തടിയായും നാളേക്കു പ്രയോജനപ്പെടുന്ന മരങ്ങള്‍ വച്ചുപിടിപ്പിക്കുകയാണ് ചെയ്യുന്നത്. തായ് വേരുള്ള മരങ്ങളായതിനാല്‍ പെട്ടെന്നു കടപുഴകി വീഴില്ലെന്ന ഗുണവുമുണ്ട്.
വിദ്യാഭ്യാസ ജില്ലയിലെ അറുന്നൂറ്റി മുപ്പതു വിദ്യാലയങ്ങളിലും ഒന്നര ലക്ഷത്തിലേറെ വിദ്യാര്‍ഥികളുടെയും എണ്ണായിരത്തിലേറെ അധ്യാപകരുടെയും വീടുകളിലും പൊതു സ്ഥലങ്ങളിലുമായി രണ്ടു ലക്ഷം നാട്ടുമരങ്ങള്‍ വച്ചുപിടിപ്പിക്കുകയെന്ന ദീര്‍ഘവീക്ഷണത്തോടെയുള്ള പദ്ധതിയാണിത്. സേവ് ജില്ലാ കോ-ഓര്‍ഡിനേറ്റര്‍ വടയക്കണ്ടി നാരായണന്‍ തിരുവള്ളൂര്‍ ശാന്തിനികേതന്‍ ഹയര്‍ സെക്കന്‍ഡറി സ്‌കൂള്‍ മൈതാനത്ത് നാട്ടുമാവിന്‍ തൈ നട്ടു കൊണ്ട് 'നാട്ടുമാ മഹോത്സവ' ത്തിന് തുടക്കമിട്ടു.
എ.എസ് റൂബി അധ്യക്ഷയായി. അബ്ദുള്‍ സമദ് എടവന, ആര്‍. കൃഷ്ണപ്രിയ, ബായിസ് ഇസ്മയില്‍, എല്‍.എ അമയ, കെ. സിദ്ധാര്‍ത്ഥ് സംസാരിച്ചു. സ്‌കൂളിലെ മുഴുവന്‍ വിദ്യാര്‍ഥികള്‍ക്കും മാവിന്‍തൈ വിതരണം ചെയ്തു.
ഇതിനുള്ള തൈകള്‍ പരിസ്ഥിതി ദിനത്തില്‍ മടപ്പള്ളി ജി.ജി.എച്ച്.എസ്.എസില്‍ നിന്നു ശേഖരിച്ചിരുന്നു.