മലപ്പുറം: മുതിര്‍ന്ന പൗരന്മാരുടെ ക്ഷേമത്തിന് സാമൂഹിക നീതി വകുപ്പ് വിപുലമായ പദ്ധതികള്‍ തയാറാക്കുന്നു. ആദ്യ ഘട്ടമെന്ന നിലയില്‍ ജില്ലയില്‍ തനിച്ച് താമസിക്കുന്ന മുതിര്‍ന്ന പൗരന്മാരുടെ വിവരങ്ങള്‍ ശേഖരിക്കും.60 വയസ് കഴിഞ്ഞവര്‍ക്ക് സ്വന്തം വീടും സ്ഥലവും ബാങ്കിന് ഈടായി നല്‍കി നിശ്ചിത തുക മാസം തോറും ബാങ്ക് നല്‍കുന്ന 'റിവേഴ്‌സ് മോര്‍ട്ട്‌ഗേജ് ' പദ്ധതിയെ പറ്റി ജില്ലയില്‍ പ്രചാരണ പരിപാടികള്‍ നടത്തും. മുതിര്‍ന്ന പൗരന്മാരുടെ ക്ഷേമവും സംരക്ഷണവും ഉറപ്പുവരുത്തുന്നതിനായി രൂപീകരിച്ച ജില്ലാതല കമ്മിറ്റിയുടെ യോഗത്തിലാണ് തീരുമാനം.
പൊലിസ് സ്റ്റേഷനുകളിലെ മുതിര്‍ന്ന പൗരന്മാര്‍ക്കുള്ള ജാഗ്രതാ സമിതികളുടെ പ്രവര്‍ത്തനം സജീവമാക്കും. മുതിര്‍ന്ന പൗരന്മാരുടെ സംരക്ഷണത്തില്‍ യുവതലമുറയുടെ പങ്കിനെപ്പറ്റി വിശദീകരിക്കുന്നതിനായി സ്‌കൂള്‍, കോളജ് വിദ്യാര്‍ഥികള്‍ക്ക് ബോധവല്‍ക്കരണ പരിപാടികള്‍ സംഘിപ്പിക്കും.
യോഗത്തില്‍ ജില്ലാ പഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍ അധ്യക്ഷനായി. മുതിര്‍ന്ന പൗരന്മാര്‍ക്കുള്ള ജില്ലാതല കമ്മിറ്റി അംഗങ്ങളായ വിജയലക്ഷ്മി, കെ. ബാലകൃഷ്ണന്‍, കെ.സി സത്യനാഥന്‍, തൃക്കുളം കൃഷ്ണന്‍കുട്ടി, പി. ശിവരാമന്‍, ഡെപ്യൂട്ടി ഡി.എ.ഒ ഡോ. അഹമ്മദ് ഹഫ്‌സല്‍, ഡി.വൈ.എസ്.പി പ്രഭാകരന്‍, ബ്ലോക്ക് പഞ്ചായത്ത് അസോസിയേഷന്‍ പ്രസിഡന്റ് അബ്ദുല്‍ കലാം തുടങ്ങിയവര്‍ പങ്കെടുത്തു.