പകര്‍ച്ചവ്യാധികള്‍ പെരുകുമ്പോഴും നടപടിയില്ലാതെ പഞ്ചായത്തും ആരോഗ്യവകുപ്പും
കിഴിശ്ശേരി: പകര്‍ച്ചവ്യാധികള്‍ പെരുകുമ്പോഴും മാലിന്യനിര്‍മാര്‍ജനത്തിനായി പദ്ധതികള്‍ ആവിഷ്‌കരിക്കാതെ അതികൃതര്‍. കുഴിമണ്ണ പഞ്ചായത്തില്‍ കിഴിശ്ശേരി അങ്ങാടിക്കടുത്ത് ഓവു പാലത്തിന് താഴെയാണ് മാലിന്യക്കൂമ്പാരം അടിഞ്ഞുകൂടിയിരിക്കുന്നത്. പ്ലാസ്റ്റിക് കവറുകള്‍ക്ക് പുറമെ അറവുശാലകളിലെയും ബ്യൂട്ടി സെന്ററുകളിലെയും മാലിന്യങ്ങളാണ് ഇവിടെ നിക്ഷേപിച്ചിരിക്കുന്നത്. നീരൊഴുക്കുണ്ടായിരുന്ന പ്രദേശത്തെ ഓവുപാലത്തിന് സമീപമുള്ള വയലുകള്‍ സ്വകാര്യ വ്യക്തികള്‍ മണ്ണിട്ട് നികത്തിയതോടെ ഇവിടെ വെള്ളം കെട്ടിനില്‍ക്കുകയാണ്. ഇതില്‍ കൊതുകുകള്‍ മുട്ടയിട്ട് പെരുകിയിട്ടും ആരോഗ്യ വകുപ്പോ പഞ്ചായത്ത് അധികൃതരോ തിരിഞ്ഞ് നോക്കിയിട്ടില്ല.
        സംസ്ഥാന സര്‍ക്കാരിന്റെ ഹരിത കേരളം പദ്ധതിയുടെ ഭാഗമായി ശുചീകരണ പ്രവര്‍ത്തനങ്ങളും കടകളടച്ച് ശുചിത്വ ഹര്‍ത്താലും നടത്തിയിരുന്നെങ്കിലും ഏറെ ആരോഗ്യ പ്രശ്‌നങ്ങള്‍ക്ക് കാരണമായേക്കാവുന്ന  ഓവുപാലത്തിനടിയിലെ മാലിന്യക്കൂമ്പാരവും മലിനജലവും ഇപ്പൊഴും ഇവിടെയുണ്ട്.
രാത്രി കാലങ്ങളില്‍ സാമൂഹ്യ വിരുദ്ധര്‍ മാലിന്യം നിക്ഷേപിക്കുന്നതിനെതിരെ പരാതിപ്പെട്ടിരുന്നെങ്കിലും നടപടിയുണ്ടായിട്ടില്ല. മഴക്കാലജന്യ രോഗങ്ങള്‍ അധികരിച്ചതിന് പുറമെ കുഴിമണ്ണ പഞ്ചായത്ത് ഉള്‍ക്കൊള്ളുന്ന അരീക്കോട് താലൂക്കാശുപത്രിയില്‍ നാല്‍പതോളം ഡെങ്കിപ്പനികള്‍ റിപ്പോര്‍ട്ട് ചെയ്തിട്ടും കൊതുക് നിര്‍മാര്‍ജനത്തിനും മാലിന്യ സംസ്‌കരണത്തിനും ആവശ്യമായ യാതൊരു നടപടിയും അധികൃതര്‍ കൈകൊണ്ടിട്ടില്ല.