മനാമ: ബഹ്‌റൈനില്‍ വിദേശ പങ്കാളിത്തത്തോടെ ആരംഭിക്കുന്ന കമ്പനികള്‍ക്ക് 30,000 ബഹ്‌റൈനി ദിനാര്‍ (ഏകദേശം 72 ലക്ഷം രൂപ) ബാങ്ക് ഗ്യാരന്റി നിര്‍ബന്ധമാക്കുന്ന നിയമ ഭേദഗതിക്ക് പാര്‍ലമെന്റ് അംഗീകാരം നല്‍കി. വാണിജ്യ കമ്പനി നിയമത്തിലെ ആര്‍ട്ടിക്കിള്‍ 264ലാണ് നിര്‍ണായകമായ ഈ ഭേദഗതി കൊണ്ടുവരുന്നത്. മണിക്കൂറുകള്‍ നീണ്ട ചര്‍ച്ചകള്‍ക്കൊടുവിലാണ് പാര്‍ലമെന്റ് ഈ തീരുമാനമെടുത്തത്. കടലാസ് കമ്പനികളെ (Shell Companies) നിയന്ത്രിക്കാനും പ്രാദേശിക വിപണിയെ സംരക്ഷിക്കാനുമാണ് ഈ നീക്കം. വിപണിയില്‍ ദീര്‍ഘകാലം നിലനില്‍ക്കുന്ന ഗൗരവകരമായ നിക്ഷേപങ്ങള്‍ മാത്രം പ്രോത്സാഹിപ്പിക്കുക. ബിസിനസ് പരാജയപ്പെട്ട് നിക്ഷേപകര്‍ രാജ്യം വിടുന്ന സാഹചര്യം ഉണ്ടായാല്‍ തദ്ദേശീയര്‍ക്ക് സുരക്ഷ ഉറപ്പാക്കുകയും ഇതിന്റെ ലക്ഷ്യമാണ്.
എം.പി ജലീല അല്‍ അലവിയാണ് ഈ ബില്ല് അവതരിപ്പിച്ചത്. പല വാണിജ്യ യൂണിറ്റുകളും അടഞ്ഞുകിടക്കുന്നതും ചുരുങ്ങിയ കാലം മാത്രം പ്രവര്‍ത്തിക്കുന്ന സ്ഥാപനങ്ങളും സാമ്പത്തിക അസന്തുലിതാവസ്ഥയുടെ ലക്ഷണമാണെന്ന് അവര്‍ മുന്നറിയിപ്പ് നല്‍കി.
എന്നാല്‍, ഈ തുക ഒരു ഫീസല്ലെന്നും മറിച്ച് നിക്ഷേപകരുടെ പ്രതിബദ്ധത ഉറപ്പാക്കാനുള്ള ഒരു ഉപാധി മാത്രമാണെന്നും എം.പി മംദൂഹ് അല്‍ സാലിഹ് വ്യക്തമാക്കി. ഈ തുക പൂര്‍ണ്ണമായും തിരികെ ലഭിക്കുന്നതാണ്. യഥാര്‍ത്ഥ നിക്ഷേപകരെ ഈ തീരുമാനം പിന്നോട്ട് നയിക്കില്ലെന്നും അദ്ദേഹം കൂട്ടിച്ചേര്‍ത്തു.
ഹസ്സന്‍ ഇബ്രാഹിം ഹസ്സന്‍, ഹിഷാം അബ്ദുല്‍ അസീസ് അല്‍ അവാദി തുടങ്ങിയ ചില അംഗങ്ങള്‍ നിക്ഷേപ അന്തരീക്ഷത്തെ ബാധിക്കുമോ എന്ന കാര്യത്തില്‍ ജാഗ്രത വേണമെന്ന് ആവശ്യപ്പെട്ടെങ്കിലും, പ്രാദേശിക വിപണിയുടെ സംരക്ഷണത്തിന് മുന്‍ഗണന നല്‍കിക്കൊണ്ട് ഭേദഗതി പാസാക്കുകയായിരുന്നു. വിദേശ നിക്ഷേപകര്‍ ഉള്‍പ്പെടുന്ന ബിസിനസ്സുകളില്‍ കൂടുതല്‍ സുതാര്യതയും ഉത്തരവാദിത്തവും ഉറപ്പാക്കാന്‍ ഈ നിയമം സഹായിക്കുമെന്നാണ് സര്‍ക്കാരിന്റെ വിലയിരുത്തല്‍.

ALSO READ: ഗള്‍ഫ് രാജ്യങ്ങളുമായി ഇന്ത്യ വമ്പന്‍ സ്വതന്ത്ര വ്യാപാര കരാറിന്: ചര്‍ച്ചകള്‍ക്ക് ഔദ്യോഗിക തുടക്കം; മന്‍മോഹന്‍ സിങ്ങിന്റെ കാലത്ത് തുടങ്ങിയ ആലോചന

Summary: The Bahraini Parliament has approved a significant amendment to Article 264 of the Commercial Companies Law. This new regulation requires companies with non-Bahraini partners to provide a BD 30,000 bank guarantee to operate in the kingdom.