വാടാനപ്പള്ളി: ആന വിഴുങ്ങി പ്രദേശത്ത് കോളനിവാസികളെയടക്കം കുടിയിറക്കി കൊണ്ട് ദേശീയപാത സ്ഥലമെടുപ്പില്‍ പ്രതിഷേധിച്ച തദ്ദേശവാസികളേയും സമരസമിതി പ്രവര്‍ത്തകരേയും പൊലിസ് ക്രൂരമായി മര്‍ദിച്ചുവെന്നാരോപിച്ച് വലപ്പാട് പഞ്ചായത്തില്‍ ഇന്നലെ ഹര്‍ത്താല്‍ നടത്തി. നാട്ടിക ആന വിഴുങ്ങി ബൈപ്പാസ് വിരുദ്ധ സമരസമിതി, ആന വിഴുങ്ങി കോളനി സംരക്ഷണ സമിതി, നാട്ടിക മേഖലാ കുടിയിറക്കു വിരുദ്ധ സമിതി സംയുക്തമായാണ് ഹര്‍ത്താല്‍ നടത്തിയത്.
ഇന്നലെ രാവിലെ ആന വിഴുങ്ങി സമരപ്പന്തലില്‍ നിന്ന് ആരംഭിച്ച പ്രതിക്ഷേധ പ്രകടനം പൊലിസ് കാവലില്‍ വലപ്പാട് പഞ്ചായത്ത് ഓഫിസിന് മുമ്പില്‍ നിന്ന് തിരിച്ചു ആനവിഴുങ്ങിയില്‍ സമാപിച്ചു. സ്ത്രീകളടക്കം നിരവധി പേര്‍ പ്രകടനത്തിലുണ്ടായിരുന്നു. സ്ത്രീകളടക്കമുള്ള 26 തദ്ദേശവാസികളെ പൊലിസ് അറസ്റ്റു ചെയ്തിരുന്നു.
സ്ത്രീകളടക്കം ആറ് പേര്‍ വലപ്പാട് ആശുപത്രിയിലെത്തിച്ചു ചികിത്സ തേടി. കോളനി സംരക്ഷണ സമിതി കണ്‍വീനര്‍ വി.കെ നിഷാദ്, നാട്ടിക ആനവിഴുങ്ങി ബൈപ്പാസ് വിരുദ്ധ സമിതി കണ്‍വീനര്‍ മി ഷോഹര്‍ഷ്, കണ്ണന്‍, പി.വി ദാസന്‍, കെ.വി ശാന്ത, ശാന്തകുമാരന്‍ എന്നിവരാണ് ചികിത്സ തേടിയത്. നിഷാദിന്റെ വാരിയെല്ലിനു പരുക്കു പറ്റിയിട്ടുണ്ട്. വലിയ പൊലിസ് സന്നാഹത്തില്‍ ബലപ്രയോഗത്തിലൂടെയാണ് ദേശീയ പാത സ്ഥലമെടുപ്പ് നടപടികള്‍ പുരോഗമിക്കുന്നത്. വന്‍കിടക്കാരെ സംരക്ഷിച്ചു പാവങ്ങളുടെ കിടപ്പാടം കൈയേറുന്ന വികസനമാണ് നടക്കുന്നത്. പ്രളയത്തില്‍പ്പെട്ട ജനങ്ങളോട് കരുണാസ്പര്‍ശമില്ലാത്ത നടപടിയാണ് സര്‍ക്കാരില്‍ നിന്നുണ്ടാക്കുന്നതെന്ന് സമരക്കാര്‍ ആരോപിച്ചു.