മട്ടാഞ്ചേരി: 'കഴിഞ്ഞ തവണ ഈ ഭാഗത്ത് നിന്ന് കാര്യമായ വോട്ട് ലഭിച്ചില്ല, ഇത്തവണ ജയിപ്പിച്ചാല്‍ ആദ്യം ഈ റോഡ് നന്നാക്കാം...' നഗരസഭ എട്ടാം ഡിവിഷനിലെ കൗണ്‍സിലറോട് റോഡ് നന്നാക്കണമെന്ന് നാട്ടുകാര്‍ ആവശ്യപ്പെട്ടപ്പോള്‍ നല്‍കിയ മറുപടിയാണിത്. മുപ്പത്തിനാല് കുടുംബങ്ങള്‍ താമസിക്കുന്ന ഡിവിഷനിലെ ജന്‍മപറമ്പിലേക്കുള്ള റോഡിന്റെ അവസ്ഥയാണ് നാട്ടുകാര്‍ കൗണ്‍സിലറെ അറിയിച്ചത്. കഴിഞ്ഞ നാല് വര്‍ഷമായുള്ള ആവശ്യം അധികാരികളും നിരാകരിച്ചതോടെ പ്രദേശവാസികള്‍ ഒടുവില്‍ സ്വയം മുന്നിട്ടിറങ്ങി റോഡ് നന്നാക്കി.

റോഡ് നന്നാക്കണമെന്ന് നാട്ടുകാര്‍ നിരന്തരമായി ആവശ്യപ്പെട്ടിട്ടും കൗണ്‍സിലര്‍ ഇങ്ങോട്ട് തിരിഞ്ഞുപോലും നോക്കിയില്ലെന്ന് പ്രദേശവാസികള്‍ പറഞ്ഞു. റോഡിലെ കുഴിയില്‍ വീണ് അപകടങ്ങള്‍ പതിവാണെന്നും ഇവര്‍ പറയുന്നു. തങ്ങള്‍ക്ക് ടൈല്‍സ് വിരിച്ച റോഡൊന്നും വേണ്ടെന്നും തകര്‍ന്ന റോഡ് കോണ്‍ക്രീറ്റ് ചെയ്താല്‍ മതിയെന്നുമാണ് നാട്ടുകാരുടെ ആവശ്യം.

കഴിഞ്ഞദിവസം ഒരു വിദ്യാര്‍ഥി റോഡിലെ കുഴിയില്‍ വീണ് മൂന്ന് പല്ലുകള്‍ പോകുകയും പ്രായമായ സ്ത്രീക്ക് കുഴിയില്‍ വീണ് പരുക്കേല്‍ക്കുകയും ചെയ്തതോടെയാണ് നാട്ടുകാര്‍ തന്നെ റോഡ് നന്നാക്കാന്‍ മുന്‍കൈയെടുത്തത്. 250 മീറ്റര്‍ മാത്രം നീളമുള്ള ഈ റോഡ് നന്നാക്കാന്‍ നേരത്തേ ഫണ്ട് പാസായതാണെന്നും എന്നാല്‍ അത് മറ്റിടത്തേക്ക് വക മാറ്റി ചിലവഴിക്കുകയായിരുന്നുവെന്നും പ്രദേശ വാസിയായ ഷുഹൈബ് അസീസ് പറയുന്നു. നാട്ടുകാര്‍ തന്നെ പണം സ്വരൂപിച്ച് ശ്രമദാനം നടത്തിയാണ് റോഡ് സഞ്ചാര യോഗ്യമാക്കുന്നത്.