കോഴിക്കോട്: സാമൂഹ്യ പ്രവര്‍ത്തകന്‍ ഫിറോസ് കുന്നംപറമ്പിലിനെതിരേ സംസ്ഥാന വനിതാ കമ്മിഷന്‍ സ്വമേധയാ കേസെടുത്തപ്പോള്‍ 'മുസ്‌ലിം സ്ത്രീകള്‍ പന്നി പെറ്റുകൂട്ടും പോലെ പ്രസവിക്കുന്നത് നിര്‍ത്താന്‍ വന്ദ്യംകരിക്കണം' എന്നുള്ള വംശീയ വിദ്വേഷം അടങ്ങിയ ഫേസ്ബുക്ക് കുറിപ്പ് പ്രസിദ്ധീകരിച്ച എഴുത്തുകാരി കെ.ആര്‍ ഇന്ദിരക്കെതിരെ കേസെടുക്കാത്ത വനിതാ കമ്മീഷനെതിരേ പ്രതിഷേധം. സ്ത്രീകളെ അധിക്ഷേപിക്കുന്ന തരത്തില്‍ ഫേസ്ബുക്കില്‍ പോസ്റ്റ് ഇട്ടതിനാണ് ഇപ്പോള്‍ ഫിറോസ് കുന്നംപറമ്പിലിനെതിരേ കേസെടുത്തത്.

ഫിറോസിനെതിരേ കര്‍ശന നടപടി സ്വീകരിക്കണമെന്ന് സംസ്ഥാന വനിതാ കമ്മിഷന്‍ അധ്യക്ഷ എം.സി ജോസഫൈന്‍ ആവശ്യപ്പെട്ടിരിക്കുകയാണ്. കേരളത്തിലെ മുഴുവന്‍ സ്ത്രീകളെയുമാണ് അദ്ദേഹം ആക്ഷേപിച്ചിരിക്കുന്നതെന്നും ഇത് അംഗീകരിക്കാനാവില്ലെന്നും അവര്‍ കൂട്ടിച്ചേര്‍ത്തിരുന്നു. കെ.എസ്.യു മുന്‍ മലപ്പുറം ജില്ലാ സെക്രട്ടറി ജസ്ല മാടശ്ശേരിക്കെതിരായ നടത്തിയ വിവാദ പരാമര്‍ശത്തിന്റെ പേരിലാണ് കമ്മിഷന്റെ നടപടി.

കുടുംബത്തിലൊതുങ്ങാത്ത, സ്വന്തം ശരീരസുഖത്തിന് വേണ്ടി മാത്രമായി ജീവിക്കുന്ന സ്ത്രീയെന്നുള്‍പ്പെടെയുള്ള പരാമര്‍ശങ്ങളാണ് ഫിറോസ് നടത്തിയത്. ഒരു പെണ്‍കുട്ടിയെ അധിക്ഷേപിക്കാന്‍ സ്ത്രീ എന്ന വാക്ക് ഈ വിധം ഉപയോഗിച്ചതിലൂടെ കേരളത്തിലെ മുഴുവന്‍ സ്ത്രീകളെയും ഫിറോസ് അപമാനിച്ചിരിക്കുകയാണെന്നും ജോസഫൈന്‍ പറഞ്ഞു.

എന്നാല്‍ മുസ്ലിം സത്രീകളെ അപമാനിക്കുന്ന എഴുത്തുകാരി കെ.ആര്‍ ഇന്ദിരക്കെതിരെ കേസെടുക്കാന്‍ കമ്മീഷന്‍ തയ്യാറായിരുന്നില്ല. രമ്യാ ഹരിദാസിനെതിരേ എല്‍.ഡി.എഫ് കണ്‍വീനര്‍ മോശമായ പരാമര്‍ശം നടത്തിയപ്പോഴും ഷാനിമോള്‍ ഉസ്മാന്‍ പൂതനയാണെന്ന് മന്ത്രി ജി.സുധാകരന്‍ പറഞ്ഞപ്പോഴും കമ്മീഷന്‍ കേസെടുത്തിരുന്നില്ല.