ന്യൂയോര്‍ക്ക് സിറ്റി: ഐക്യരാഷ്ട്ര സഭയ്ക്കു കീഴിലുള്ള കുട്ടികള്‍ക്കു വേണ്ടിയുള്ള സംഘടനയായ യൂനൈറ്റഡ് നാഷന്‍സ് ചില്‍ഡ്രന്‍സ് ഫണ്ടി(യൂനിസെഫ്)ന്റെ ഗുഡ്‌വില്‍ അംബാസഡറായി സിറിയന്‍ അഭയാര്‍ഥിയെ തിരഞ്ഞെടുത്തു. വിദ്യാഭ്യാസ പ്രവര്‍ത്തക കൂടിയായ 19കാരി മുസൂന്‍ അല്‍ മലീഹാനാണ് യൂനിസെഫിന്റെ ഏറ്റവും പ്രായം കുറഞ്ഞ ഗുഡ്‌വില്‍ അംബാസഡറെന്ന അപൂര്‍വതയ്ക്ക് അര്‍ഹയായിരിക്കുന്നത്.
യൂനിസെഫ് ഡെപ്യൂട്ടി എക്‌സിക്യൂട്ടിവ് ഡയരക്ടര്‍ ജസ്റ്റിന്‍ ഫോര്‍സിത്ത് ആണ് വാര്‍ത്ത പുറത്തുവിട്ടത്. ഔദ്യോഗിക അഭയാര്‍ഥി പദവിയുള്ള യൂനിസെഫിന്റെ ആദ്യ ഗുഡ്‌വില്‍ അംബാസഡര്‍ കൂടിയാണ് മലീഹാന്‍ എന്ന് അദ്ദേഹം പറഞ്ഞു.
നിലവില്‍ ജോര്‍ദാനിലെ അഭയാര്‍ഥി ക്യാംപിലാണ് ഈ കൗമാര പ്രതിഭ കഴിയുന്നത്. നേരത്തെ സിറിയയില്‍ നിന്നു പലായനം ചെയ്യുമ്പോള്‍ മലീഹാന്‍ പുസ്തകങ്ങള്‍ മാത്രം കൂടെക്കൊണ്ടുപോയ വാര്‍ത്ത മാധ്യമങ്ങള്‍ റിപ്പോര്‍ട്ട് ചെയ്തിരുന്നു.