കൊയിലാണ്ടി : എ.ടി.എമ്മിലെ സൈറണ്‍ കൊയിലാണ്ടി നഗരത്തില്‍ ജനങ്ങളെ പരിഭ്രാന്തി പരത്തി. ഇന്നലെ ഉച്ചയ്ക്ക് രണ്ട് മണിയോടെയായിരുന്നു സംഭവം. വിവരമറിഞ്ഞ് കൊയിലാണ്ടി പോലിസെത്തി പരിശോധന നടത്തിയപ്പോഴാണ് കുഴപ്പക്കാരനെ കണ്ട് നാട്ടുകാരും പോലിസും ഞെട്ടിയത്. വലിയൊരു ഉടുമ്പാണ് വില്ലന്റെ വേഷത്തില്‍ എത്തിയത്. നഗരത്തിലെ ഡ്രൈവര്‍മാരും പോലിസുകാരും ഉടുമ്പിനെ എ .ടി.എമ്മിനുള്ളില്‍ നിന്നും പുറത്താക്കി എ.ടി.എം. പ്രവര്‍ത്തനസജ്ജമാക്കുകയായിരുന്നു. നഗരത്തില്‍ എ.ടി.എം. കവര്‍ച്ച ശ്രമം നടക്കുന്നതായി വാര്‍ത്ത പ്രചരിച്ചതിനെ തുടര്‍ന്ന് വലിയ ജനക്കൂട്ടം എ.ടി.എം.പ്രവര്‍ത്തിക്കുന്ന സിന്‍ഡിക്കേറ്റ് ബാങ്ക് പരിസരത്ത് തടിച്ച് കൂടിയിരുന്നു.