പുത്തന്‍ചിറ: ചരിത്രമുറങ്ങുന്ന കരിങ്ങോള്‍ച്ചിറയിലെ രാജഭരണകാലത്ത് നിര്‍മിക്കപ്പെട്ട പൈതൃക സ്മാരകങ്ങളുടെ സംരക്ഷണ നടപടികള്‍ അട്ടിമറിക്കുന്നതായി ആക്ഷേപം.
തെരുവ് നായ്കളുടെ താവളമായി നാട്ടുകാരുടെ സുരക്ഷക്ക് ഭീഷണിയാകുന്ന പൈതൃക സ്മാരകങ്ങള്‍ ചുറ്റു മതില്‍ കെട്ടി സംരക്ഷിക്കുന്നതിനായി പുത്തന്‍ചിറപഞ്ചായത്ത് ഫണ്ട് വകയിരുത്തിയിരുന്നു.
എന്നാല്‍ ചില നിക്ഷിപ്ത താല്‍പര്യക്കാര്‍ അതിര്‍ത്തി തര്‍ക്കവുമായി രംഗത്ത് വന്നതോടെ മതില്‍ നിര്‍മാണം തടസപ്പെട്ടു. ഇതോടെ സംരക്ഷിക്കാന്‍ സംവിധാനങ്ങള്‍ ഇല്ലാതെ തിരുവതാംകൂര്‍ രാജഭരണത്തിന്റെ ശേഷിപ്പുകളായ പൊലിസ് സ്റ്റേഷനും അഞ്ചല്‍പെട്ടിയും കാട് കയറി തെരുവ് നായ്കളുടെ ആവാസ കേന്ദ്രമായി മാറിയിരിക്കുകയാണ്. ഇതിനെതിരെ വലിയ പ്രതിഷേധമാണ് ഉയരുന്നത്. പുത്തന്‍ചിറമാള റൂട്ടില്‍ റോഡിനരികില്‍ സ്ഥിതിചെയ്യുന്ന ഈ പൈതൃക സ്മാരകങ്ങള്‍ തെരുവ് നായകളുടെ താവളമായി മാറിയതോടെ രാപകല്‍ വ്യത്യാസമില്ലാതെ ഇത് വഴിയുള്ള യാത്ര അപകടമായി തീര്‍ന്നിരിക്കയാണ്. നായകളുടെ സൈ്വര്യ വിഹാരം കാരണം സ്‌കൂള്‍ കുട്ടികള്‍ ഉള്‍പ്പടെയുള്ളവര്‍ ഇതുവഴി ഭീതിയോടെയാണ് സഞ്ചരിക്കുന്നത്. രാജഭരണകാലത്ത് തിരുവിതാംകൂറിന്റെയും കൊച്ചിയുടേയും അതിര്‍ത്തിപ്രദേശമായിരുന്ന പുത്തന്‍ചിറയില്‍ കള്ളന്‍മാരുടെയും കള്ളകടത്തുകാരുടേയും ശല്യം രൂക്ഷമായിരുന്നു. അതിനാലാണ് ഇവിടെ പൊലിസ് സ്റ്റേഷനും ജയിലും സ്ഥാപിച്ചതെന്നാണ് പഴമക്കാര്‍ പറയുന്നത്. ഇതില്‍ പൊലിസ് സ്റ്റേഷന്‍ കെട്ടിടത്തിന്റെ കേടുപാടുകള്‍ മാസങ്ങള്‍ക്ക് മുന്‍പ് തീര്‍ത്തെങ്കിലും ബാക്കിയുള്ള ശേഷിപ്പുകള്‍ നശിക്കുകയാണ്.
കൊച്ചിതിരുവിതാംകൂര്‍ അതിര്‍ത്തിയിലെ ചുങ്കപ്പിരിവ് കേന്ദ്രവും ഇവിടെയായിരുന്നെന്നാണ് ചരിത്രം പറയുന്നത്. അന്ന് ഇന്നാട്ടുകാരുടെ സുരക്ഷക്കു വേണ്ടി സ്ഥാപിക്കപ്പെട്ട ഈ സ്ഥാപനങ്ങള്‍ ഇന്ന് ഈ പ്രദേശത്തുകാരെ ഭീതിയുടെ നിഴലിലാക്കിയിരിക്കുകയാണ്.
രാജ ഭരണ കാലത്തെ ജയില്‍ കാട് കയറി പാടെ തകര്‍ന്നിരിക്കുകയാണ്. അത് ഇനി സംരക്ഷിക്കാന്‍ കഴിയാത്തതിനാല്‍ പൊളിച്ച് നീക്കി തല്‍സ്ഥാനത്ത് ജനങ്ങള്‍ക്ക് ഉപകാരപ്രദമായ വായനശാലപോലെയുള്ള ഒരു സ്മാരക മന്ദിരം നിര്‍മിക്കാനെങ്കിലും അധികൃതര്‍ തയാറാകണമെന്ന ആവശ്യവും ഉയരുന്നുണ്ട്. അതുവഴി തെരുവ് നായ ഭീഷണി ഇല്ലാതാക്കാനും പുത്തന്‍ചിറയിലെ പൈതൃക സ്മാരകങ്ങളുടെ ഓര്‍മ നിലനിത്താനും സാധിക്കുമെന്നാണ് നാട്ടുകാരുടെ പ്രതീക്ഷ.