ഗൂഡല്ലൂര്‍: ജനവാസ കേന്ദ്രത്തിലിറങ്ങിയ കാട്ടാന വീടിന്റെ മേല്‍ക്കൂര തകര്‍ത്തു. നെല്ലാക്കോട്ട പഞ്ചായത്തിലെ വിലങ്ങൂര്‍ സ്വദേശി കുഞ്ഞിമുഹമ്മദിന്റെ വീടിന്റെ മേല്‍ക്കൂരയാണ് തകര്‍ത്തത്.
ശുചി മുറിയില്‍ പോകാനായി രാത്രി വീടിന് പുറത്തിറങ്ങിയ കുഞ്ഞിമുഹമ്മദ് മുറ്റത്ത് നിന്നിരുന്ന ആനയെ കണ്ട് വീട്ടിലേക്ക് തിരിഞ്ഞ് ഓടുന്നതിനിടെ വീണ് പരുക്കേല്‍ക്കുകയും ചെയ്തു. കുഞ്ഞിമുഹമ്മദിനെ നാട്ടുകാര്‍ നെല്ലാക്കോട്ട ആശുപത്രിയില്‍ പ്രവേശിപ്പിച്ചു. ഇയാളുടെ വീടിന് സമീപത്തെ ശേഖറിന്റെ ആലയും രാജന്റെ വീടിന് സമീപത്തെ ഷെഡും കാട്ടാന തകര്‍ത്തിട്ടുണ്ട്. വിവരമറിഞ്ഞ റെയ്ഞ്ചര്‍ മനോഹരന്റെ നേതൃത്വത്തിലുള്ള വനപാലക സംഘമെത്തി കാട്ടാനയെ വനത്തിലേക്ക് തുരത്തി.