കൊച്ചി: മുന്‍ മുഖ്യമന്ത്രി ഉമ്മന്‍ചാണ്ടിക്കും അടൂര്‍ പ്രകാശിനുമെതിരെ ത്വരിത പരിശോധനക്ക് ഉത്തരവ്. മുന്‍സര്‍ക്കാരിന്റെ കാലത്തു നടത്തിയ വിവാദമായ ഉത്തരവുകളിലൊന്നായ ഹോപ്പ് പ്ലാന്റേഷന്‍ ഭൂമി കൈമാറ്റവുമായി ബന്ധപ്പെട്ട കേസിലാണ് ഉത്തരവ്. കളമശ്ശേരി സ്വദേശി ഗിരീഷ് ബാബു നല്‍കിയ പരാതിയുടെ അടിസ്ഥാനത്തിലാണ് നടപടി.

റവന്യൂ പ്രിന്‍സിപ്പല്‍ സെക്രട്ടറിയായിരുന്ന വിശ്വാസ് മേത്ത, ഹോപ്പ് പ്ലാന്റേഷന്‍ എം.ഡി എന്നിരടക്കം ആറ് പേര്‍ക്കെതിരെയാണ് അന്വേഷണമുള്ളത്.

ഹോപ് പ്ലാന്റേഷന് മിച്ചഭൂമി പതിച്ചു നല്‍കാന്‍ യുഡിഎഫ് സര്‍ക്കാര്‍ അവസാന കാലത്താണ് തീരുമാനമെടുത്തത്. തീരുമാനത്തിനെതിരെ കെപിസിസി പ്രസിഡന്റ് ഉള്‍പ്പെടെയുള്ളവര്‍ പരസ്യമായി രംഗത്തെത്തിയിരുന്നു. ഉത്തരവ് പിന്‍വലിക്കണമെന്ന് ആവശ്യപ്പെട്ട് വി എം സുധീരന്‍ സര്‍ക്കാരിന് കത്തുനല്‍കി. തുടര്‍ന്ന് ഏപ്രില്‍ മാസം ആറിന് ചേര്‍ന്ന മന്ത്രിസഭാ യോഗം തീരുമാനം പിന്‍വലിക്കുകുകയും ചെയതു.