തളിപ്പറമ്പ്: ആറ് മാസമായുള്ള വൈദ്യുതി തകരാറ് പരിഹരിക്കാത്തതും ജീവനക്കാര്‍ക്ക് ആവശ്യമായ അടിസ്ഥാന സൗകര്യമൊരുക്കാത്തതും തളിപ്പറമ്പ് താലൂക്ക് ഭൂരേഖ തഹസില്‍ദാരുടെ ഓഫിസ് പ്രവര്‍ത്തനത്തെ താറുമാറാക്കുന്നു. ആറുമാസമായി ഭാഗികമായാണ് ഇവിടെ വൈദ്യുതി ലഭിക്കുന്നത്. ഇതുകാരണം ഓഫിസിന്റെ പകുതിയിലേറെ ഭാഗത്തെ ഫാനുകളും ലൈറ്റുകളും പ്രവര്‍ത്തിക്കുന്നില്ല. കൂടാതെ ജീവനക്കാര്‍ക്ക് ഉപയോഗിക്കാനുളള കംപ്യൂട്ടറുകളും പ്രിന്ററുകളും പ്രവര്‍ത്തിപ്പിക്കാനും സൗകര്യല്ലാത്തതും ഓഫിസ് പ്രവര്‍ത്തനത്തെ ഗുരുതരമായി ബാധിച്ചിരിക്കുകയാണ്.
ഇത് ഓഫിസിനെ ആശ്രയിക്കുന്ന പൊതുജനങ്ങളെയും ജീവനക്കാരെയുമാണ് ദുരിതത്തിലാക്കുന്നത്. തളിപ്പറമ്പ് മിനി സിവില്‍സ്റ്റേഷന്‍ കെട്ടിടത്തില്‍ പ്രവര്‍ത്തിപ്പിക്കുന്ന തളിപ്പറമ്പ് താലൂക്ക് ഭൂരേഖ തഹസില്‍ദാരുടെ ഓഫിസിനാണ് ഈ ദുരവസ്ഥ. ഓഫിസിനുവേണ്ടി അനുവദിച്ച കംപ്യൂട്ടറുകളും പ്രിന്ററുകളും മുകള്‍നിലയിലെ റീസര്‍വേ ഓഫിസിലെത്തിച്ചാണ് ഇപ്പോള്‍ അത്യാവശ്യ ജോലികള്‍ ചെയ്യുന്നത്. മുപ്പതോളം ജീവനക്കാരുള്ള ഓഫിസില്‍ ആവശ്യത്തിന് ഫര്‍ണിച്ചറുകളും ഫയല്‍ സൂക്ഷിക്കുന്നതിനുള്ള അലമാരകളും ഇതുവരെയായി ഒരുക്കിയിട്ടില്ല. 2012 മുതലുള്ള ഫയലുകള്‍ ക്രമപ്പെടുത്തി സൂക്ഷിക്കാനാവാത്തത് കാരണം അപേക്ഷകളില്‍ തീരുമാനമുണ്ടാകുന്നത് വൈകുകയാണ്.
വൈദ്യുതി തകരാറു കാരണം പ്രിന്ററുകള്‍ യഥാക്രമം സ്ഥാപിക്കാത്തതുകൊണ്ട് തീര്‍പ്പായ നിരവധി കേസുകളുടെ സ്‌കച്ചുകള്‍ നല്‍കാനും സാധിക്കാത്ത അവസ്ഥയാണുള്ളതെന്ന് എന്‍.ജി.ഒ അസോസിയേഷന്‍ നേതാക്കള്‍ കുറ്റപ്പെടുത്തി.
പ്രശ്‌നവുമായി ബന്ധപ്പെട്ട് നിരവധി തവണ തഹസില്‍ദാര്‍ക്കും മേല്‍ഉദ്യോഗസ്ഥര്‍ക്കും പരാതി നല്‍കിയിരുന്നതായി ഇവര്‍ പറഞ്ഞു. തുടര്‍ന്ന് ഇന്നലെ തഹസില്‍ദാരുമായി ചര്‍ച്ച നടത്തിയതിന്റെ അടിസ്ഥാനത്തില്‍ ഉടന്‍ പരിഹാരമുണ്ടാക്കാമെന്ന ഉറപ്പു നല്‍കിയതായും ഇതിനു തയാറായില്ലെങ്കില്‍ ശക്തമായ പ്രക്ഷോഭം സംഘടിപ്പിക്കുമെന്നും എന്‍.ജി.ഒ അസോസിയേഷന്‍ ഭാരവാഹികളായ കെ.വി മഹേഷ്, പി.വി വിനോദ്, വി.ആര്‍ സുധീര്‍, കെ. മനോജ്, കെ.വി പ്രശാന്തന്‍ എന്നിവര്‍ പറഞ്ഞു.