താമരശ്ശേരി: കുന്ദമംഗലം എം.എല്‍.എ പി.ടി.എ റഹീമിന്റെ മകനും മരുമകനും ഹവാല ഇടപാടുമായി ബന്ധപ്പെട്ട് സഊദിയില്‍ പിടിക്കപ്പെട്ട സാഹചര്യത്തില്‍ ഹവാല ഇടപാടുമായി ബന്ധപ്പെട്ട് എം.എല്‍.എക്കുള്ള പങ്കിനെക്കുറിച്ച് സമഗ്രാന്വേഷണം നടത്തണമെന്ന് കൊടുവള്ളി നിയോജക മണ്ഡലം മുസ്‌ലിം യൂത്ത് ലീഗ് പ്രസിഡന്റ് ടി. മൊയ്തീന്‍കോയ, ജന.സെക്രട്ടറി റഫീക്ക് കൂടത്തായി എന്നിവര്‍ ആവശ്യപ്പെട്ടു.
കഴിഞ്ഞ നിയമസഭാ തെരഞ്ഞെടുപ്പില്‍ കുന്ദമംഗലത്തും, കൊടുവള്ളിയിലും ഇടതു സ്ഥാനാര്‍ഥികള്‍ പണക്കൊഴുപ്പ് നടത്തിയതായി ആരോപണമുയര്‍ന്നിരുന്നു. പി.ടി.എ റഹീമിന്റെ മകനും മരുമകനും ഹവാല ഇടപാടുമായി ബന്ധപ്പെട്ട് പിടിക്കപ്പെട്ടതോടെ ഈ ആരോപണം ശരിയായിരുന്നുവെന്ന് വ്യക്തമായിരിക്കുകയാണ്. കുന്ദമംഗലം കൊടുവള്ളി എം.എല്‍.എമാര്‍ നിരന്തരം നടത്തിക്കൊണ്ടിരിക്കുന്ന വിദേശ യാത്രകളെക്കുറിച്ച് അന്വേഷിക്കണം. ഇരുവരും അധികാരത്തിന്റെയും ഭരണത്തിന്റെയും സ്വാധീനത്തില്‍ ഹവാല ഇടപാടുകാര്‍ക്ക് സംരക്ഷണം നല്‍കിക്കൊണ്ടിരിക്കുകയാണ്. നിയമവിരുദ്ധ രീതിയില്‍ തെരഞ്ഞെടുക്കപ്പെട്ട ഇരുവരും ധാര്‍മികതയുണ്ടെങ്കില്‍ രാജിവെച്ച് ജനങ്ങളോട് മാപ്പു പറയാന്‍ തയ്യാറാവണമെന്നും നേതാക്കള്‍ ആവശ്യപ്പെട്ടു.