കാളികാവ്: ജില്ലയില്‍ കനത്ത മഴ. കഴിഞ്ഞ രണ്ടുദിവസങ്ങളിലാണ് വ്യാപകമായ മഴ ലഭിച്ചത്. മലയോര മേഖലയിലും വ്യാപകമായി മഴ പെയ്തു. വന്‍മരം കടപുഴകി വീണ് സംസ്ഥാന പാതയില്‍ മണിക്കൂറുകളോളം ഗതാഗതം തടസപ്പെട്ടു. നിലമ്പൂര്‍ പെരുമ്പിലാവ് സംസ്ഥാന പാതയില്‍ കാളികാവ് ചെങ്കോടിനടുത്താണ് ഇന്നലെ പുലര്‍ച്ചെ നാലരക്ക് വന്‍ പുളിമരം കടപുഴകി വീണത്.
റോഡിന് എതിര്‍ ദിശയിലുള്ള കുണ്ടില്‍ ആയിശ കുട്ടിയുടെ കെട്ടിടം ഭാഗികമായി തകര്‍ന്നു. കെട്ടിടത്തിനു പുറകില്‍ വാടകയ്ക്കു താമസിക്കുന്ന സുകുമാരനും കുടുംബവും കെട്ടിടം തകരുന്ന ശബ്ദം കേട്ട് ഇറങ്ങി ഓടിയതിനാല്‍ രക്ഷപെട്ടു.
        ബ്രിട്ടീഷുകാരുടെ കാലത്ത് പാതയോരങ്ങളില്‍ വച്ചു പിടിപ്പിച്ച മരങ്ങളില്‍ ശേഷിക്കുന്നവയില്‍ പെട്ടതാണ് 150ലധികം വയസുള്ള വന്‍ പുളിമരം. കാളികാവ് ബസാര്‍ ഗവ.യു.പി സ്‌കൂളിലേക്കുള്ള റോഡിനു ചാരിയാണ് മരം വീണത്. സംസ്ഥാന പാതയിലെ ഗതാഗതം തടസപ്പെട്ടതോടെ കാളികാവ് പൊലിസ് സ്റ്റേഷന്‍ നീലാഞ്ചേരി  വഴി വാഹനങ്ങള്‍ തിരിച്ചുവിട്ടു.
വണ്ടൂര്‍:കനത്ത മഴയില്‍ വീടിനോട് ചേര്‍ന്നുള്ള കിണര്‍ ഇടിഞ്ഞ് സമീപത്ത് വലിയ ഗര്‍ത്തം രൂപപെട്ടു. ശാന്തിനഗര്‍ ഏമങ്ങാടിലെ ആനക്കയത്ത ചന്ദ്രന്റെ വീട്ടിലെ കിണറാണ് തകര്‍ന്നത്.തിങ്കളാഴ്ച രാത്രി പെയ്ത കനത്ത മഴയിലാണ് കിണര്‍ താഴ്ന്ന തൊട്ടടുത്ത് ഗര്‍ത്തം രൂപപെട്ടത്. വണ്ടൂര്‍ വില്ലേജ് ഓഫിസര്‍ കെ.പി പ്രമോദ്,വില്ലേജ് അസിസ്റ്റന്റ് മനോജ് എന്നിവര്‍ സ്ഥലത്തെത്തി പരിശോധന നടത്തി.
മഞ്ചേരി: കരിങ്കല്‍ഭിത്തി വീടിനു സമീപത്തേക്കു തകര്‍ന്നുവീണു. മഞ്ചേരി കരുവമ്പ്രം ജെ.ടി.എസ് സ്‌കൂളിനു സമീപം അനുവീട്ടില്‍ അബ്ദുല്‍ അസീസിന്റെ വീടിനു മുന്‍വശത്തേക്കാണു ഭിത്തി തകര്‍ന്നുവീണത്. തിങ്കളാഴ്ച രാവിലെ പതിനൊന്നോടെയാണ് സംഭവം.വീടിനും മതിലിനുമിടയില്‍ ഒന്നര മീറ്റര്‍ മാത്രമാണ് അകലമുണ്ടായിരുന്നത്.
മഞ്ചേരി വാട്ടര്‍ അതോറിറ്റിയുടെ ഉടമസ്ഥതയിലുള്ള വളപ്പിനു സംരക്ഷണമെന്നോണം നിര്‍മിച്ച കരിങ്കല്‍ ഭിത്തി രണ്ടു വര്‍ഷം മുന്‍പാണ് 13 അടിയോളം ഉയരംകൂട്ടിയത്. ഭിത്തിയുടെ ഇത്രയും ഉയരം വീടിനു ഭീഷണിയാണെന്നു വാട്ടര്‍ അതോറിറ്റി അധികൃതരെ വീട്ടുകാര്‍  അറിയിച്ചിരുന്നു. കാലപ്പഴക്കം ചെന്ന ഭിത്തി ശക്തമായ മഴയെ തുടര്‍ന്നാണ് തകര്‍ന്നത്. ഇതുമൂലം വീടിനോടു ചേര്‍ന്നുള്ള ഷെഡും പൂര്‍ണമായി തകര്‍ന്നിട്ടുണ്ട്. തകര്‍ന്നുവീണ ഭിത്തിയുടെ അവശിഷ്ടങ്ങള്‍ നീക്കംചെയ്യുന്നതിനാവശ്യമായ നടപടികള്‍ ഉടന്‍ കൈക്കൊള്ളുമെന്നു വാട്ടര്‍ അതോറിറ്റി അധികൃതര്‍ പറഞ്ഞു.
എടക്കര: മഴയെത്തുടര്‍ന്ന് മുസ്‌ലിയാരങ്ങാടിയിലെ വീട്ടില്‍ വെള്ളം കയറി. നിലംപതിക്കല്‍ ഭീഷണിയില്‍  കാണിച്ചിറ അബൂബക്കറിന്റെ വീട്ടിലാണ് വെള്ളം കയറിയത്. അടുക്കളയും, കിടപ്പുമുറിയും,  വെള്ളത്തിലാണ്. കിണറിലെ വെള്ളവും മലിനമായിട്ടുണ്ട്. ഇന്നലെ വൈകിട്ടോടെയാണ് വീടിനുള്ളില്‍  വെള്ളം കയറിയത്. തൊട്ടടുത്ത സ്ഥലത്ത് മണ്ണിട്ട് ഉയര്‍ത്തിയതാണ് കാരണം. അയനിക്കാടന്‍ കുഞ്ഞിപ്പ,  തലക്കോട്ടു പുറത്ത് മയീന്‍ കുട്ടി, നെച്ചോട്ടില്‍ ജമീല എന്നിവരുടെ വീടുകളും വെള്ളം കയറല്‍  ഭീഷണിയിലാണ്.
എടവണ്ണ: കനത്ത മഴയില്‍ വീടിന്റെ സംരക്ഷണഭിത്തി  തകര്‍ന്നു. പത്തപ്പിരിയം പോത്തുപെട്ടിയിലെ എകരത്ത് അബ്ദുല്‍ കരീമിന്റെ വീടിന്റെ അടുക്കളയോട് ചേര്‍ന്ന  സംരക്ഷണഭിത്തിയാണ് തകര്‍ന്നുവീണത്. ഇരുപത്തഞ്ചടിയോളം താഴ്ചയിലേക്കാണ് സംരക്ഷണഭിത്തി തകര്‍ന്നുവീണത്.
വണ്ടൂര്‍: കനത്ത മഴയില്‍ പുളിശ്ശേരി കൊട്ടമ്പാറ നാലകത്ത് ലുഖ്മാന്റെ വീട്ടിലെ വീടിനോട് ചേര്‍ന്നുള്ള കിണര്‍ ഇടിഞ്ഞു താഴ്ന്നു.
കിണറിന്‍െ ഉള്‍ഭാഗം പൂര്‍ണമായും ഇടിഞ്ഞ് താഴ്ന്നതിനാല്‍ മോട്ടോറും ആള്‍മറയും കിണറിനു ചുറ്റും വച്ചിരുന്ന ഇരുമ്പ് ഗ്രില്ലും കിണറിനുള്ളില്‍ പെട്ടു.