അരീക്കോട്: ബസ് ബൈക്കിലിടിച്ച് മൂന്നുപേര്‍ക്ക് പരുക്കേറ്റു. അരീക്കോട് സ്റ്റേഷനിലെ ഹോംഗാര്‍ഡ് ഐ.ടി.ഐ സ്വദേശി ശ്രീനിവാസന്‍ (56), നിലമ്പൂര്‍ പോത്തുകല്ല് സ്വദേശി കെ. ജാബിര്‍ (24), മഞ്ചേരി സ്വദേശി അസ്‌ലം (25) എന്നിവര്‍ക്കാണ് പരുക്കേറ്റത്. അസ്‌ലമിന്റെ പരുക്ക് ഗുരുതരമാണ്.
ഇന്നലെ വൈകിട്ട് ആറിന് അരീക്കോട് ടൗണിലാണ് അപകടമുണ്ടായത്. അരീക്കോട് സ്റ്റാന്‍ഡില്‍ നിന്നും മുക്കം റോഡിലേക്ക് ഇറക്കം ഇറങ്ങി വരികയായിരുന്ന സ്വകാര്യ ബസ് നിയന്ത്രണം നഷ്ടമായതോടെ യുവാക്കള്‍ സഞ്ചരിച്ച ബൈക്കിന് മുകളിലേക്ക് പാഞ്ഞുകയറുകയായിരുന്നു.
ഈ സമയം ഇതിലൂടെ കാല്‍നടയായി പോകുകയായിരുന്ന ഹോംഗാര്‍ഡും അപകടത്തില്‍പെടുകയായിരുന്നു. ബസിനടിയില്‍ കുടുങ്ങിയ മൂന്ന് പേരെയും അര മണിക്കൂറിനുശേഷം ക്രെയിന്‍ ഉപയോഗിച്ച് ബസ് ഉയര്‍ത്തിയാണ് പുറത്തെടുത്തത്. ഉടന്‍ അരീക്കോട് പത്തനാപുരത്തെ സ്വകാര്യ ആശുപത്രിയില്‍ എത്തിച്ചെങ്കിലും പിന്നീട് കോഴിക്കോട് മെഡിക്കല്‍ കോളജിലേക്ക് മാറ്റി.ഹോം ഗാര്‍ഡ് ശ്രീനിവാസന്‍ കോഴിക്കോട് സ്വകാര്യ ആശുപത്രിയില്‍ ചികിത്സയിലാണ്.
ജാബിറും അസ്‌ലമും മഞ്ചേരിയിലെ കോഴി വ്യാപാരവുമായി ബന്ധപ്പെട്ട കളക്ഷന്‍ ഏജന്റുമാരാണ്. കോഴി വ്യാപാരികളില്‍ നിന്ന് പണം പിരിച്ച് തിരിച്ച് മഞ്ചേരിയിലേക്ക് പോകുന്നതിനിടയിലാണ് അപകടത്തില്‍പ്പെട്ടത്.