കൊച്ചി: വടുതലയില്‍ 12 വയസുകാരിയെ പ്രണയം നടിച്ച് പീഡിപ്പിച്ച കേസില്‍ അഞ്ച് വിഡിയോകള്‍ പൊലിസ് കണ്ടെടുത്തു. കേസിലെ ഒന്നാംപ്രതിയും കാമുകനുമായ ലിതിന്‍, രണ്ടാംപ്രതി വര്‍ഷ എന്നിവരുടെ മൊബൈല്‍ഫോണില്‍ നിന്നാണ് ദൃശ്യങ്ങള്‍ കണ്ടെടുത്തത്. പെണ്‍കുട്ടിയെ പീഡിപ്പിക്കുന്ന ദൃശ്യങ്ങള്‍ നേരിട്ട് പകര്‍ത്തിയത് വര്‍ഷയായിരുന്നുവെന്നും പൊലിസ് പറഞ്ഞു.
സാങ്കേതിക വിദഗ്ധന്റെ സഹായത്തോടെ പ്രതികളുടെ മൊബൈല്‍ ഫോണില്‍ നിന്നും കണ്ടെടുത്ത ദൃശ്യങ്ങള്‍ ഫൊറന്‍സിക് പരിശോധനയ്ക്ക് നല്‍കും. പ്രതികള്‍ സാമ്പത്തിക ലാഭം ലക്ഷ്യമിട്ട് ഈ വിഡിയോകള്‍ യൂ ട്യൂബ് ഉള്‍പ്പെടെയുള്ള നവമാധ്യമങ്ങള്‍ക്ക് വില്‍പ്പന നടത്തിയിട്ടുണ്ടോയെന്ന് ഈ പരിശോധനയിലൂടെ വ്യക്തമാകും. പ്രണയം നടിച്ച് പെണ്‍കുട്ടിയെ പീഡിപ്പിച്ച ലിതിന് പെണ്‍വാണിഭ സംഘങ്ങളുമായി ബന്ധമുണ്ടോയെന്നും പരിശോധിക്കുമെന്ന് എറണാകുളം നോര്‍ത്ത് പൊലിസ് പറഞ്ഞു.
പെണ്‍കുട്ടിയെ പീഡിപ്പിക്കുന്നതിനും ദൃശ്യങ്ങള്‍ മൊബൈലില്‍ പകര്‍ത്തുന്നതിനും സഹായം ചെയ്ത് കൊടുത്തത് ദമ്പതിമാരായ ബിബിനും വര്‍ഷയും ചേര്‍ന്നാണ്. ഇരുവരും പ്രണയിച്ചാണ് വിവാഹിതരായത്. 12 വയസുകാരിയെ വര്‍ഷയ്ക്ക് നേരിട്ടറിയാം. ഈ സാഹചര്യവും പ്രതികള്‍ മുതലാക്കി. ബിബിന്റെ വടുതലയിലുള്ള വീട്ടിലെത്തിച്ച് ജൂണ്‍ മുതല്‍ പീഡിപ്പിച്ചതായാണ് പെണ്‍കുട്ടി മൊഴി നല്‍കിയിട്ടുള്ളത്.
അതേസമയം കേസില്‍ അറസ്റ്റിലായ ലിതിനെ കോടതിയില്‍ ഹാജരാക്കി റിമാന്‍ഡ് ചെയ്തു. പ്രതികളെ കസ്റ്റഡിയില്‍ വിട്ടുകിട്ടാന്‍ അപേക്ഷ നല്‍കുമെന്ന് എറണാകുളം നോര്‍ത്ത് പൊലിസ് പറഞ്ഞു.