ധാക്ക: ജയിലില്‍ കഴിയുന്ന ബംഗ്ലാദേശ് പ്രതിപക്ഷ നേതാവ് ഖാലിദ സിയക്കു തെരഞ്ഞെടുപ്പില്‍ മത്സരിക്കാന്‍ സാധ്യമല്ലെന്നു ബംഗ്ലാദേശ് സര്‍ക്കാര്‍. അടുത്ത മാസം നടക്കുന്ന പൊതുതെരഞ്ഞെടുപ്പില്‍ മത്സരിക്കുന്നതില്‍നിന്നാണ് അവരെ വിലക്കിയതെന്ന് ബംഗ്ലാദേശ് അറ്റോര്‍ണി ജനറല്‍ മെഹ്ബൂബെ ആലം പറഞ്ഞു.
അഴിമതിക്കേസില്‍ പത്തു വര്‍ഷത്ത തടവാണ് ഖാലിദ സിയയ്‌ക്കെതിരേ വിധിച്ചിരിക്കുന്നത്. രണ്ടു വര്‍ഷത്തില്‍ കൂടുതല്‍ തടവിനു ശിക്ഷിക്കപ്പെട്ടവര്‍ക്കു തെരഞ്ഞെടുപ്പില്‍ മത്സരിക്കാനാകില്ലെന്ന കീഴ്‌ക്കോടതി വിധി സുപ്രിംകോടതി കഴിഞ്ഞ ദിവസം ശരിവച്ചിരുന്നു. തെരഞ്ഞെടുപ്പില്‍ മത്സരിക്കാന്‍ അനുവദിക്കണമെന്നാവശ്യപ്പെട്ടു ഖാലിദ സിയയുടെ അനുയായികള്‍ നല്‍കിയ ഹരജിയില്‍ വിധി പറയുകയായിരുന്നു കോടതി.
ഈ വിധിയനുസരിച്ചു ഖാലിദ സിയക്കു തെരഞ്ഞെടുപ്പില്‍ മത്സരിക്കാന്‍ സാധ്യമല്ലെന്ന് അറ്റോര്‍ണി ജനറല്‍ പറഞ്ഞു. കോടതി വധിക്കെതിരേ ഖാലിദ സിയയുടെ പാര്‍ട്ടിയായ ബംഗ്ലാദേശ് നാഷനല്‍ പാര്‍ട്ടി (ബി.എന്‍.പി) രംഗത്തെത്തിയിരുന്നു. സര്‍ക്കാരിന്റെ താല്‍പര്യത്തിന്റെ പ്രതിഫലനമാണ് കോടതി വിധിയിലൂടെ പുറത്തുവന്നതെന്ന് ബി.എന്‍.പി ജനറല്‍ സെക്രട്ടറി മിര്‍സ ഫക്‌റുല്‍ ഇസ്‌ലാം ആലംഗീര്‍ പറഞ്ഞു.
ജയിലിലായിരിക്കെ തന്നെ ധാക്കയിലെ മൂന്നു പാര്‍ലമെന്റ് മണ്ഡലങ്ങളില്‍ ഖാലിദ സിയയെ മത്സരിപ്പിക്കാനായിരുന്നു പാര്‍ട്ടിയുടെ പദ്ധതി. പ്രധാനമന്ത്രി ശൈഖ് ഹസീനക്കെതിരേ അവരെ മത്സരിപ്പിക്കാനും തീരുമാനിച്ചിരുന്നെന്ന് ബി.എന്‍.പി പറഞ്ഞിരുന്നു. 1990 മുതല്‍ ബംഗ്ലാദേശ് ഭരിക്കുന്നതു ഖാലിദ സിയയോ ശൈഖ് ഹസീനയോ നേതൃത്വം നല്‍കുന്ന സര്‍ക്കാരുകളാണ്. 2014ല്‍ നടന്ന പൊതുതെരഞ്ഞെടുപ്പിലാണ് ഹസീന പ്രധാനമന്ത്രിയായത്. തെരഞ്ഞെടുപ്പ് പ്രതിപക്ഷമായ ബി.എന്‍.പി ബഹിഷ്‌കരിച്ചിരുന്നു.